مستحقیں نادراہ آناں علاج ءِ آسراتی ءِ پجارینگ حکومت ءِ اولی ترجی آنی تہ ءَ ھوار اِنت، وفاقی وزیر سید عمران احمد شاہ

لاہور۔1اپریل (اے پی پی): گریبی ءِ ھلاسی ءُ چاگردی رکھینگ ءِ وفاقی وزیر سید عمران احمد شاہ ءَ گوشت کہ مستحقیں نادراہ آناں وھد ءِ سر ءَ علاج ءِ آسراتی پجارینگ حکومت ءِ اولی ترجی آنی تہ ءَ ھوار اِنت۔ میو ہسپتال ءُ اے دگہ اسپتال آنی تہ ءَ پاکستان بیت المال ءِ ھاسیں ڈیسک جوڑ کنگ بیت۔ اے ھیالانی درشانی آئی ءَ چار شمبے ءِ روچ ءَ میو ہسپتال لاہور ءَ برجم داشتگیں دیوان ءَ پد میڈیا ءَ گوں تران کنان ءَ کت۔ وفاقی وزیر سید عمران احمد شاہ ءَ گوشت کہ مرچی ما میو اسپتال ءَ ساڑی ایں کہ پاکستان ءِ مزنیں اسپتال آنی تہ ءَ یکے زانگ بیت۔ مرچی دیوان ءِ مول ءُ مراد مزن وزیر محمد شہباز شریف ءِ وژن ءِ رد ءَ مستحقیں نادراہ آناں آسراتی ءُ وھد ءِ سر ءَ علاج ءِ پجاری ءَ را دل یکیمی کنگ اِنت۔ آئی ءَ گوشت کہ مزن وزیر ءِ وژن ءَ را دیم ءَ برگ ءِ واستہ آئی ءَ ملک ءِ جتا جتائیں ہسپتال آنی تر ءُ تاب کتگ، ایشی ءِ تہ ءَ الائیڈ ہسپتال فیصل آباد، نشتر ہسپتال ملتان، پمز ہسپتال اسلام آباد، نوری ہسپتال ءُ ایندگر ہسپتال آنی تر ءُ تاب کتگ۔ آئی ءَ گوشت کہ منی ھیال ءَ پاکستان بیت المال ءَ گوں ھمگرنچیں مردم، اسپتال آنی انتظامی ءُ چاگردی گہبود ءِ نیام ءَ جوانیں تپاک ءِ ھست بہ بیت تانکہ ھچ وڑیں رابطہ ءِ کمی ءِ سبب ءَ نادراہ آنی علاج ءَ را متاثر مہ بیت۔ سید عمران احمد شاہ ءَ گوشت کہ پاکستان ءِ گریبی ءِ ھلاسی ءُ چاگردی ایمنی ءُ پاکستان بیت المال ءِ چیر دستی ءَ جیڈھ آناں ترندی ءَ گوں پسو دیگ بیت ءُ ھما جاہ ءَ کہ مارا حکومت پاکستان ءِ دگہ کجام ھم وزارت ءَ را سفارش کنگی انت گڈا ما ھمے سر ءَ کار کن ایں ۔ آئی ءَ گوشت کہ من اے گپ ءَ پدر کنگ لوٹ آں کہ پاکستان بیت المال ءِ نیمگ ءَ چہ داتگیں وانگ ءُ زانگ ءِ سکالرشپ یا میڈیکل کمک زکات نہ انت، اے وقف فنڈ انت کہ پاکستان ءِ حکومت بیت المال ءَ دنت۔ آئی ءَ گیش گوشت کہ اے سال ءَ ما ایشی ءِ فنڈ ءَ را 10ارب ءَ چہ 14ارب ءَ گیش کتگ ءُ آیوکیں بجٹ ءَ ایشی ءَ را گیش گیش کنگ بیت تانکہ ما گیش ءَ چہ گیش زھرناکیں انسانیت ءُ گریبیں الس ءِ ھزمت ءَ بہ کن ایں ۔ وفاقی وزیر ئَ گوشت کہ میڈیکل فنڈ ئِ تہ ئَ پیسر ئَ 2ارب ئُُ نیم بوتگ ایشی ئَ چہ سئے ارب ئَ گیش کنگ بوتگ۔ ھمے رنگ ءَ انفرادی ٹرانسپلانٹ یا دل ءِ آپریشن ءِ واستہ یک ملین کلدار ءِ مقررہ زر بوتگ، ایشی ءَ را یک ءُ نیم ملین کلدار ءَ گیش کنگ بوتگ ءُ زھگ آنی وانگ ءُ زانگ ءِ واستہ سالانہ فنڈ کہ یک لکھ کلدار بوتگ ات یک ملین کلدار ءَ گیش کنگ بوتگ۔ آئی ءَ گوشت کہ گوستگیں پنچ سال آنی تہ ءَ ما میو اسپتال ءَ نزیک ءَ یک ارب کلدار کمک داتگ ایشی ءَ چہ نزیک ءَ 15ہزار نادراہ آں سیت رستگ۔ منی واھگ اِنت کہ میو ہسپتال ءَ پاکستان بیت مال ءِ ھاسیں ڈیسک جوڑ کنگ بہ بیت دانکہ مستحقیں نادراہ ءَ را دپتر ءِ کش ءُ گور ءَ روگی مہ بیت بلکیں آ ہسپتال ءِ تہ ءَ وت آسراتی ءَ بہ رسیت۔ یک جُستے ءِ پسو ءَ وفاقی وزیر ءَ گوشت کہ آیوکیں وھد ءَ پاکستان ءِ پڑ ءُ دگنیا ءَ یک جتائیں بستارے بیت۔ خلیج ءِ جاور ھال آنی تہ ءَ وزارت ءِ درئی کار آنی کرد ھمک مردم ءِ دیم ءَ انت کہ ایشی ءَ را دگنیا گندگ ءَ انت ءُ ایشی ءَ را میاں اوستمانی تک ءَ ھم ساڑاھگ بوھگ ءَ انت۔ ایشی ءَ چہ پیسر ایم ایس میو ہسپتال ءَ ھوار دگہ طبی افسراں وفاقی وزیر ءَ را سرجمیں بریفنگ داتگ۔