بلوچستان نا غیرشونداری خڑچ آتیٹی پدریسہ ودکی وخت اس کہ شونداری وسیلہ غاک کم مننگ ءُ، دارداٹ صوبہ نا تینا وسیلہ غاتیٹی ودکی المی مسنے، وزیراعلیٰ بلوچستان میر سرفراز بگٹی نا بلوچستان ریونیو اتھارٹی نا ایڈوائزری کونسل نا دیوان آن تران

کوئٹہ۔ 01 اپریل (اے پی پی ) وزیراعلیٰ بلوچستان میر سرفراز بگٹی نا کماشی ٹی بلوچستان ریونیو اتھارٹی نا ایڈوائزری کونسل نا مسٹ میکو اہم دیوان چارشنبے نادے آ چیف منسٹر سیکرٹریٹ اٹی اڈ ہلک ہراٹی صوبہ ٹی ریونیو نا نظام ءِ پین گچین، شفاف و پوسکن آ خواست آتون ہم گرنچ کننگ و تخوک آ ہدف آتا دوئی کننگ کن اہم فیصلہ کننگا ، دیوان اٹی آڈٹ رولز ، ڈیجیٹلائزیشن و چندی اصلاحاتی گام گیج آتا باقاعدہ منظوری ءِ تننگا داوخت آ چیئرمین بلوچستان ریونیو اتھارٹی عبداللہ خان دیوان ءِ ریونیو ہدف آتا دوئی کننگ، برجاگام گیج  وکارکڑد نا بابت سرجمی اٹ حوال تس ، حوال اٹی پاننگاکہ چِل ارب روپئی نا مقررہ سالانہ ہدف نا نیمہ دوئی کننگانے وخت اس کہ پورو ہدف آتا دوئی کننگ کن تگ ودود برجاءِ ، وزیراعلیٰ بلوچستان میر سرفراز بگٹی مقررہ ریونیو ہدف آتا دوئی کننگ ءِ پک کننگ کن فیلڈ آپریشن تے گچین و متحرک جوڑ کننگ نا پارت کرے ، وزیراعلیٰ پارے کہ بلوچستان نا غیرشونداری خڑچ آتیٹی پدریسہ ودکی مننگ ءِ وخت اس کہ شونداری وسیلہ غاک کچ اٹ مرسا کننگ ءُ دارداٹ صوبہ نا تینا وسیلہ غاتیٹی ودکی المی مسنے  ، اوزور شاغا کہ ریونیو ءِ ودفنگ وخت انا اہم گرج ءِ و داڑکن خراج نیٹ ءِ ودفوئی مریک ۔ اوپارت کرے کہ پوسکن آ ٹیکنالوجی نا گچین کاریم اٹ اتنگ ءِ پک کننگے تانکہ خراج وصولی نا نظام ءِ شفاف و خودکار جوڑ کننگ مرے ، وزیراعلیٰ پارت کرے کہ بلوچستان ریونیو اتھارٹی نا عملہ نا کسبی کچ ءِ ودفنگ کن پوسکن تربیت فراوان کننگ و ادارہ نا فعالیت ءِ گچین کننگ کن نجی بشخ انا چاہندار آتا خذمت دوئی کننگے تانکہ ریونیو اتھارٹی نا کارکڑد اٹی نمان ودکی مرے، دیوان اٹی ریونیو نا نظام ءِ پین گچین جوڑ کننگ و صوبہ نا مالی وتواجہی ءِ سوگو کننگ نا عزم انا درشانیءِ کننگا ایڈوائزری کونسل نا دیوان اٹی صوبائی وزیر خزانہ میر شعیب نوشیروانی، چیف سیکرٹری بلوچستان شکیل قادر خان ، چیئرمین بلوچستان ریونیو اتھارٹی عبداللہ خان، پرنسپل سیکرٹری عمران زرکون، سیکرٹری ایکسائز اینڈ ٹیکسیشن سید ظفربخاری تون اوار تعلقدار بڑزکو کمامدارآک بشخ ہلکر۔