وزارت بنجائی تعلیم وکسبی تربیت ریمیڈیل تھراپی سروسز نا فراوانی نا ڈٹ آتا بناکن معاہدہ غا دستخط کرے

اسلام آباد۔ 01 اپریل (اے پی پی ) وزارت بنجائی تعلیم و کسبی تربیت جامع تعلیم نا مون آ دننگ کن اہم گام انا وڑاٹ بنجائی نظامت تعلیم (ایف ڈی ای) نا رداٹ 346 تعلیمی ادارہ غاتیٹی ‘‘ریمیڈیل تھراپی سروسز نا فراوانی’’ نا ڈٹ آتا بناکن معاہدہ غا دستخط کرے۔ معاہدہ غا دستخط نا دود اسلام آباد اٹی مس ہراٹی نیشنل انسٹی ٹیوٹ آف سائیکالوجی ، مرکز امتیاز، قائداعظم یونیورسٹی تون شریداری ءِ باضابطہ دروشم اس تننگا۔ داوخت آبنجائی وزیر تعلیم ڈاکٹر خالد مقبول صدیقی، سیکرٹری وزارت ندیم محبوب و بنجائی نظامت تعلیم نا بڑزکو کمامدارآک ہم ساڑی ئسر وخت اس کہ پروفیسر ڈاکٹر روبینہ حنیف معاہدہ ءِ گڈیکو دروشم اس تس۔ دا گام ڈسلیکسیابل 2022 نا رداٹ کننگانے ہرانا مسخت ہیل کننگ اٹ مشکلات آتا گواچی طالب علم آتے وخت آ و گچین کمک فراوان کننگ ءِ۔ ڈٹ انا رداٹ 60 چاہندار ریمیڈیل تھراپسٹس و 3 آزموندہ کار ءِ کوآرڈینیٹر آتیا تالان ٹیم تعینات کننگک ہرا طالب علم آتا تشخیصی جاچ اتون اوار اوار پٹ وپولی بنداوتیا تالان درمان اٹی کمک فراوان کیک۔ کمامدارآتا رداٹ داڈٹ انا کمک اٹ ماہرنفسیاتی خذمت آتے استاد آتا کسبی تربیت تون یکجا کننگک تانکہ اسہ پائیدار نظام اس جوڑ کننگ مرے۔ دانظام نا رداٹ چندی تعلیمی گرج آتاحامل طالب علم آتے رسمی تعلیمی پنجر نا تہہ ٹی تینا لائخی تا پبی درشانی نا بریبر وارخواہی فراوان کننگک۔ دا ڈٹ حکومت نا داعزم انا ڈیک ءِ ایتک کہ ملک اٹی جامع و بریبر تعلیمءِ مون آ دننگے و ہرچناءِ مون آہِننگ نا اسہ وڑ وارخواہی دُوبرے۔