وزیراعظم شہباز شریف نا کماشی ٹی ورناتیکن ملازمت ناوارخواہی تے ودفنگ نا گام گیج آتا بارواٹی جاچ دیوان، ورناتے تکنیکی و فنی تربیت فراوان کننگ کن گام گیج آتے ترند کننگ نا پارت

اسلام آباد۔ 01 اپریل (اےپی پی ) وزیراعظم محمد شہباز شریف ساڑی آ خواست آتار داٹ ورناتے تکنیکی و فنی تربیت فراوان کننگ کن گام گیج آتے تیز کننگ نا پارت کرساپارینے کہ حکومت تربیت یافتہ افرادی قوت تیار کننگ کن چندی گام گیج آتے کننگ ءِ۔ چارشنبے نادے آ داڑے وزیراعظم محمد شہباز شریف نا کماشی ٹی ورناتیکن ملازمت نا وارخواہی تے ودفنگ کن گام گیج آتا بابت جاچ دیوان اس اڈ ہلک۔ ہراٹی بنجائی وزیر ڈاکٹر مصدق مسعود ملک ، احد خان چیمہ ، محمد اورنگزیب، عطاء اللہ تارڑ، چوہدری سالک حسین ، ڈاکٹر احسن اقبال ، شزا فاطمہ خواجہ ، وزیر مملکت بلال اظہرکیانی، چیئرمین پرائم منسٹر یوتھ پروگرام رانا مشہود احمد خان ، چیئرمین ایچ ای سی و تعلقدار ادارہ غاتا بڑزکو آفیسر آک ساڑی ئسر۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم رانا مشہود احمد خان نا کماشی ٹی پی ایم یوتھ پروگرام نا کارکڑد آ است جمی نا درشانی ءِ کرساپارے کہ ورناک ننا قوم انا آخبت ءُ، حکومت اوفتے کسبی مہارت فراوان کننگ و اوفتے افرادی قوت اٹ اوار کننگ کن چندی گام گیج کننگ ءِ۔ وزیراعظم پارت کرے کہ ساڑی آ خواست آتا رداٹ ورناتے تکنیکی و فنی تربیت فراوان کننگ نا بابت گام گیج آتیٹی ترندی اتنگے۔ اوپارے کہ نیشنل ووکیشنل اینڈ ٹیکنیکل ٹریننگ کمیشن اٹ ساڑی آ اصلاحات آن پد ورناتے تکنیکی تربیت نا فراوانی ٹی بھلو گچینی اس بسنے، ورناافرادی قوت نا لائخی تے کاریم اٹ اتنگ کن نیوٹک نا کمک اٹ بناکروک آ ہیلکاری پروگرام نا مثبت بھرم مون آ بننگ بناکرینے۔ وزیراعظم پارے کہ جہانی کہول آ زیات خواست والا کسب نا بابت ورناتا جہانی سرٹیفکیشن تون فنی و تکنیکی تربیت اولیت ءِ۔ دیوان اٹی وزیراعظم ءِ پیشن نا ملک و قومی کہول آ ورناتیکن ملازمت نا وارخواہی ودی کننگ نا بابت گام گیج آتا بارواٹی معلومدار کننگا۔ دیوان اٹی حوال اٹی پاننگاکہ پرائم منسٹر یوتھ پروگرام و وزارت خارجہ جہانی کہول آ ورناتیکن ملازمت نا چندی وارخواہی شناخت کرینو و پین وارخواہی پٹنگ آ کاریم برجاءِ ، پی ایم یوتھ ہب قومی و جہانی کہول آ ملازمت ناوارخواہی تا معلومداری نا بابت مرکزی حیثیت اختیارکرینے، پیشن نا ملک آتیٹی آئی ٹی، جان جوڑی، تعمیرات، سیل سوات، لاجسٹک و ایلو بشخ آتیٹی ملازمت نا وارخواہی ساڑی ءِ۔ حوال نا رداٹ ہائیر ایجوکیشن کمیشن پاکستان نا 282 جامعہ غاتیان فارغ مروک آ طالب علم آتا ڈیجیٹل ایپ نا کمک اٹ روزگارنا بابت ٹریکنگ کننگ ءِ ہرانا کمک اٹ فارغ مروک آ طالب علم آتے ملازمت ملنگ ناریکارڈ تخنگ انگ ءِ ، دا ریکارڈآخبت کن تعلیمی پالیسی اس جوڑ کننگ اٹ کمکار مریک۔ حوال اٹی پاننگاکہ تکنیکی تربیت نا مون آ دننگ کن بنجائی وزارت تعلیم نا بست وبند اٹی 32 تعلیمی ادارہ غاتیٹی میٹرک ٹیک درستی راستی کننگانے، فنی و تکنیکی تربیت نا بابت میٹرک ٹیک نا وڑآ انٹرٹیک ہم زوت درستی راستی کننگک۔