پاکستان انفارمیشن ٹیکنالوجی نا بشخ اٹی جدت و جہانی زرکاری ءِ ودفنگ کن گچین و جوان حکمت عملی نا رداٹ کاریم کننگ ءِ، وزیراعظم شہباز شریف

اسلام آباد۔ 01 اپریل (اے پی پی ) وزیراعظم محمد شہباز شریف ملک اٹی ڈیجیٹل آپریٹرز انڈسٹری ٹی زرکارآتے ہرممکن آسراتی فراوان کننگ نا عزم انا درشانی ءِ کرسا پارینے کہ پاکستان انفارمیشن ٹیکنالوجی نا بشخ اٹی جدت و جہانی زرکاری ءِ ودفنگ کن گچین وجوان حکمت عملی نا رداٹ کاریم کننگ ءِ۔ وزیراعظم محمد شہبازشریف تون جہانی ڈیجیٹل آپریٹرVEONگروپ نا چیف ایگزیکٹیو آفیسر کان ترزی اوعلو ڈل اتون اوار اوڑدہی کرے۔ وزیراعظم آفس نا میڈیا ونگ انا کنڈآن چارشنبے نادے آ جاری بیان نا رداٹ وزیراعظم ڈل اتون گپ وتران کرسا پارے کہ حکومت ملک اٹی ڈیجیٹل آپریٹرز انڈسٹری ٹی زرکارآتے ہرممکن آسراتی فراوان کننگ کن سنبرینگوک ءِ۔ پاکستان اٹی ساڑی آ 5 جی سپیکٹرم نا سرسہب نیلامی دا بشخ اٹی جدت کن ننا مثبت و گچین سمت انا شاہدی ءِ۔ وزیراعظم پارے کہ پاکستان زرگزران نا بشخ اٹی ڈیجیٹلائزیشن ءِ تینا کرسا شفافیت ءِ پک کننگ خواہک۔ ملک اٹی ٹیلی کام آپریٹرز ءِ 5 جی اسپیکٹرم نا نیلامی آن پد الس ءِ آب اٹ انٹرنیٹ سروس تننگ کن غٹ تعلقدار  ادارہ غاک تین پہ تینی کمکاری و ہم گرنچی اٹ کاریم کننگ ءُ۔ پاکستان نا ورناآبادی انفارمیشن ٹیکنالوجی و ڈیجیٹل پلیٹ فارم آتیا تعمیری بشخ ہلنگ آن ملک انا زرگزران و ایلو آب اٹ سروس آتا فراوانی ٹی اہم کڑد ادا کننگ کیرہ۔ پاکستان نا ورنا آبادی نا ٹیلی کام و انفارمیشن ٹیکنالوجی ٹی رجحان جہانی زرکارآتیکن است خواہی نا سوب ءِ۔ وزیراعظم پارے کہ پاکستان انفارمیشن ٹیکنالوجی نا بشخ اٹی جدت ءِ تینا کننگ و جہانی زرکاری ءِ ودفنگ کن گچین و جوان حکمت عملی نا رداٹ کاریم کننگ ءِ۔ بنجائی حکومت جہانی زرکارآتا آسراتی و آسانی کن غٹ ادارہ غاتا تین پہ تینی کمکاری اٹ عملی گام گیج کننگ ءِ۔ اوپارے کہ کیش لیس زرگزران نا دوئی کننگ کن انفارمیشن ٹیکنالوجی نا گچین کاریم اٹ اتنگ حکومت نا اولیت آتیٹی اوار ءِ۔ جہانی ڈیجیٹل آپریٹرVEONگروپ نا چیف ایگزیکٹیو آفیسر کان ترزی اوعلو پارے کہ وزیراعظم پاکستان غٹ بشخ آتیٹی شفافیت و زرکاری ءِ ودفنگ کن بھاز گچین گام گیج کرینے، پاکستان ڈیجیٹل اکانومی نا دوئی کننگ و 5 جی اسپیکٹرم نا نیلامی ٹی بھاز تیز رفتاری اٹ کاریم کرینے ہرا ستاکڑزک۔ کان ترزی اوعلو کیش لیس اکانومی و زرگزران نا پورو ڈیجیٹلائزیشن کن وزیراعظم نا چاروکی ٹی حکومت نا کنڈآن کروک آ گام گیج آتا ستاءِ کرے۔ اوتینا کمپنی نا کنڈآن پاکستان اٹ پین زرکاری ءِ ودفنگ نا ارادہ نا ہم درشانی ءِ کرے۔ اوڑدہی ٹی بنجائی وزیر خزانہ محمد اورنگزیب ، بنجائی وزیر انفارمیشن ٹیکنالوجی شزافاطمہ خواجہ، بنجائی وزیر اقتصادی امور احد خان چیمہ ، جیز ورلڈ انا چیف ایگزیکٹیو آفیسر عامر ابراہیم و ایلو تعلقدار سرکاری عہدیدار آک بشخ ہلکر۔