سی پیک پاکستان ءُ چین ءِ نیام ءَ اسٹریٹجک، اقتصادی ءُ دیمروئی شریکداری ءِ مستریں ءُ نامداریں مثال انت، بنجاھی وزیر احسن اقبال

اسلام آباد۔31مارچ  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ سی پیک پاکستان ءُ چین ءِ نیام ءَ اسٹریٹجک، اقتصادی ءُ دیمروئی شریکداری ءِ مزنیں ءُ نامداریں مثال اِنت، ایشی ءِ تہ ءَ دوئیں ملک آنی یکجائی دیمروئی ءِ واستہ وت مہ وتی بھروسہ ءُ عزم ءِ درشان اِنت۔ چین پاکستان اقتصادی راہداری ءِ منصوبگ آنی تہ ءَ جوانیں کارکردگی پیش داشتگیں پاکستانی ءُ چینی کارندہ آنی شرپ ءَ برجم داشتگیں سالانہ مراگش ءَ گوں تران کنان ءَ آئی ءَ گوشت کہ اے ایوک ءَ ایوارڈ مراگش نہ اِنت بلکینگ ءَ سی پیک ءِ واستہ کار کنوکیں مردم آنی ھزمت ءِ جزبگ ءِ منگ اِنت۔ آئی ءَ پاکستانی ءُ چینی پیشہ ور آناں شگر ءُ منت گپت ءُ گوشت کہ سی پیک ءِ انجینئر دراصل  ءَ اے منصوبگ آنی آرکیٹیکٹ اَنت ایشاں اے منصوبگ آنی سرجم کنگ ءِ واستہ شپ ءُ روچ محنت کتگ ءُ برجمیں دیمروئی ءِ واستہ کوشست کنگ ءَ اَنت۔ احسن اقبال ءَ گوشت کہ سی پیک پاکستان ءُ چین ءِ نیام ءَ شریکداری ءِ مستریں درور انت۔ آئی ءَ یات کت کہ سی پیک ءِ بندات ءِ وھد ءَ پاکستان ءَ را دراجیں لوڈ شیڈنگ ءِ آماچ بوتگ بلے توانائی ءِ شوبگ ءَ چین ءِ سرمایہ کاری ءَ اے جیڈھ ءِ گیواری ءَ کلیدی کرد پیلو کتگ۔ آئی ءَ گوشت کہ گوستگیں دہ سال آنی تہ ءَ سی پیک ءَ پاکستان ءِ اقتصادی دیمروئی ءِ تہ مزنیں کردے پیلو کتگ ءُ کار کنوکیں الس آنی کوشست آنی سبب ءَ توان ءِ بحران ءَ را مزنیں کساسے ءَ چہ گر ءُ چیل بوتگ۔ دوست ہما مردم اِنت کہ مشکلیں ساھت ءَ کار ءَ کیت ءُ چین ءَ ھمک مشکلیں ساھت ءَ پاکستان ءِ کمک کتگ ۔ وفاقی وزیر ءَ گوشت کہ اگاں سی پیک نہ بوتیں گڈا پاکستان انگت ءَ توان ءِ بحران ءِ آماچ بیت وھدیکہ اے منصوبگ دوئیں ملک آنی نیام ءَ سیادی ءَ را گیش مھکم کنگ ءَ انت۔ گوادر ءِ گیش بوھوکیں جیو پولیٹیکل ارزشت ءِ سر ءَ چمشانک دیان ءَ آئی ءَ گوشت کہ گوادر یک سادہیں کوسٹل شہر ءَ چہ یک اسٹریٹجک گیٹ وے ءِ تہ ءَ بدل بوھگ ءَ اِنت کہ ایشی ءِ تہ ءَ میاں اوستمانی بالی پٹ، نادراھجاہ، پیشہ وارانہ ادارگ ءُ بنیاتی شہری آسراتی آنی تہ ءَ ترندی ءَ گوں دیمروئی کنگ بوھگ ءَ اِنت۔ احسن اقبال ءَ گوشت کہ سی پیک ءِ دومی بھر (دومی بھر) صنعتی کنگ، نوآبادیاتی ءُ ھواریں دیمروئی ءِ نیمگ ءَ یک مزنیں گامگیج اِنت، انفراسٹرکچر ءَ چہ دیم ءَ روگ اِنت۔ آئی ءَ گوشت کہ اے بھر ءِ تہ ءَ انوویشن کوریڈور، لیو ہڈ کوریڈور ءُ ریجنل ڈویلپمنٹ منصوبگ ھوار انت ایشی ءَ چہ معیشت ءَ را گیش مھکم بیت۔ آئی ءَ گیش گوشت کہ پاکستان ءِ واستہ شمسی نظام ءُ نوکیں موسمیاتی نظام ءِ منصوبگ سک باز ارزشت ءِ دار اَنت۔ ایشی ءَ ابید چین ءُ پاکستان ءِ زانت ءِ راہداری ءِ جوڑ کنگ ءِ بابت ءَ گپ ءُ تران بوھگ ءَ انت ایشی ءِ مول ءُ مراد نوکیں نسل ءَ را ہائیر ایجوکیشن ءِ واستہ جوانیں موہ پجارینگ انت۔ وفاقی وزیر ءَ گوشت کہ پاکستان چین ءِ گوما وتی سیادی آناں سک باز ارزشت دنت ۔ آئی ءَ گوشت کہ ستمبر 2025 ءَ مزن وزیر ءِ بیجنگ ءِ تر ءُ تاب ءِ ساھت ءَ پنچ سالی ایکشن پلان (2025-2029) ءِ سر ءَ دستخط کنگ بوتگ، اے سی پیک ءِ راجدپتر ءِ تہ ءَ سرجمیں روڈ میپ اِنت ءُ پاکستان ءِ ’’اوران پاکستان‘‘ پنچ اے فریم ورک ءِ رد ءَ اِنت۔ مراگش ءِ گڈ ءَ آئی ءَ یک رندے پدا سی پیک ءِ منصوبگ آنی تہ ءَ خدمت کنوکیں توامیں پاکستانی ءُ چینی زانتکار ءُ کارکن آنی کوشست آناں ساڑات ءُ وتی جزم ءِ درشان کت کہ حکومت اے منصوبگ آناں وھد ءِ سر ءَ سرجم کنگ ءُ گیش ودینگ ءِ واستہ جزمیگ انت۔