ڈپٹی چیئرمین سینیٹ سیدال خان ناصر ءَ کوئٹہ ءَ جتاجتائیں سیاسی ءُ چاگردی مردمانی گسانی تر ءُ تاب کتگ، دلپدردی ءِ درشان

اسلام آباد۔31مارچ  (اے پی پی): سینیٹ ءِ ڈپٹی چیئرمین سیدال خان ناصر ءَ کوئٹہ ءَ جتاجتائیں سیاسی ءُ چاگردی مردمانی گس آنی سر ءَ تر ءُ تاب کتگ ءُ وتی نزیکیں مردم آنی بیرانی ءِ سر ءَ دل ءِ جہلانکی ءَ دلپدردی ءِ درشانی کتگ ءُ بیران بوتگیں مردم ءِ ابدمان ءِ واستہ فاتحہ ءِ پیشکش کتگ۔ اے درگت ءَ ڈپٹی چیئرمین سینیٹ سپریم کورٹ بار ایسوسی ایشن ءِ پیسریگیں صدر میان رؤف عطا ایڈووکیٹ ءِ گس ءَ سر بوتگ کہ اودا آئی ءَ وتی پت ءِ بیرانی ءِ سر ءَ سک باز رنج ءُ گم ءِ درشانی کتگ۔ پمیشکیں کھول ءِ گوما ھمدردی ءِ درشانی کنان ءَ آئی ءَ گوشت کہ مات ءُ پت آنی جتای ناقابل تلافی تاوان اِنت۔ آئی ءَ دعا کت کہ اللہ تعالیٰ بیران بوتگیں مردم ءَ وتی رحمت ءِ تہ ءَ بُرزیں مقامے بہ دنت ءُ کھول ءَ صبر ءُ اوپار بہ دنت۔ اے موہ ءِ سر ءَ مسلم لیگ (ن) بلوچستان ءِ کارکن ھم ساڑی ات انت ۔ دومی نیمگ ءَ ڈپٹی چیئرمین سینیٹ مسلم لیگ (ن) بلوچستان ءِ مزنیں سروک ناہید کوسر ءِ گس ءَ ھم شتگ ءُ آئی ءَ آئی ءِ لوگ بانک ءِ بیرانی ءِ سر ءَ دلپدردی درشان کتگ ءُ فاتحہ پیش کتگ۔ آئی ءَ غم ءِ آماچیں کھول ءِ گوما سرجمیں یکوئی ءِ درشانی کت ءُ گوشت کہ اے غم ءِ ساھت ءَ آ یک برابریں شریک آں ۔ آئی ءَ بیران بوتگیں مردم ءِ رُتبہ ءِ بُرز کنگ ءُ غم ءِ آماچیں ھاندان ءِ صبر ءُ اوپار ءِ ھم دعا کتگ۔ اے موہ ءَ پارٹی کارکنانی مزنیں کساسے ساڑی ات ۔ ایشی ءَ پد سینیٹ ءِ ڈپٹی چیئرمین اسمبلی ءِ پیسریگیں باسک عمروز جان مسیح ءِ گس ءَ شتگ ءُ اودا آئی ءَ وتی زالبول ءِ بیرانی ءِ سر ءَ سک باز رنج ءُ گم ءِ درشانی کتگ۔ آئی ءَ پہ غم ءِ آماچیں ھاندان ءَ صبر ءُ دلیری ءِ دعا کتگ۔ اے موہ ءِ سر ءَ ھم مسلم لیگ (ن) بلوچستان ءِ کارکناں آئی ءِ ھمراہ بوتگ ءُ گوں کھول ءَ دلپدردی درشان کتگ۔ دومی نیمگ ءَ مسلم لیگ (ن) یوتھ ونگ ءِ نائب صدر جہانگیر خروتی ءَ ڈل ءِ گوما سینیٹ ءِ ڈپٹی چیئرمین سیدال خان ناصر ءَ گوں گند ءُ نند کت۔ گند ءُ نند ءَ استان ءِ کلیں سیاسی جاور ءُ دمگی ملسلہ ءُ پارٹی ءِ تنظیمی کارانی بابت ءَ گوں تفصیلی گپ ءُ تران کنگ بوت۔ اے موہ ءِ سرءَ صوبائی اسمبلی ءِ پیسریگیں باسک حاجی قادر مندوکھل ھم ساڑی ات۔ گند ءُ نند ءَ پارٹی ءَ را گیش فعال ءُ مھکم جوڑ کنگ ءِ عزم ءِ پدا زور پر دات ءُ وت مہ وتی سیادی آناں دیمروئی دیگ ءِ سر ءَ زور پر دات۔