سعودی عرب، ترکیہ ءُ مصر ءِ دری کارانی وزیر میان اُستمانی تک ءَ کش ءُ چیل ءِ کم کنگ ءُ دمگ ءَ امن ءِ کوشست آناں دیم ءَ برگ ءِ ھاترا مشاورتی دیوان ءَ بھر زوری ءَ پد واتر بوتگ اَنت

اسلام آباد۔30مارچ (اے پی پی): سعودی عرب، ترکیہ ءُ مصر ءِ درئی کارانی وزیر میاں اوستمانی تک ءَ کش ءُ چیل ءِ کم کنگ ءُ دمگ ءَ امن ءِ کوشست آناں دیم ءَ برگ ءِ ھاترا مشاورتی دیوان ءَ بھر زوری ءَ پد واتر بوتگ اَنت۔ آھاں بالی پٹ ءَ میاں اوستمانی تک ءِ ایڈیشنل سیکرٹری سید احمد معروف، اوگانستان ءُ مغربی ایشیا ءِ ایڈیشنل سیکرٹری سید علی اسد گیلانی ءُ وزارت ءِ درئی کار ءِ ایندگر کارندہ آں یلہ داتگ۔ سعودی عرب ءِ درئی کارانی وزیر شہزادہ فیصل بن فرحان، جمہوریہ ترکیہ ءِ درئی کارانی وزیر ہاکان فیدان ءُ عرب جمہوریہ مصر ءِ درئی کارانی وزیر ڈاکٹر بدر عبدالعاطی ءِ پاکستان ءِ تر ءُ تاب ءِ مول ءُ مراد پاکستان، سعودی عرب، ترکیہ ءُ مصر ءِ نیام ءَ مشاورتی عمل ءِ دومی دیوان ءَ بہر زورگ ات کہ ایشی ءِ تہا اسلام بابا بوتگ۔ اے درگت ءَ اولی دیوان 19 مارچ 2026 ءَ ریاض ءَ بوتگ ات ایشاں نائب مزن وزیر ءُ درئی کارانی وزیر محمد اسحاق ڈار ءِ دعوت ءِ سرا اسلام آباد ءِ تر ءُ تاب کتگ ات۔ وزیر درئی کار آں دیوان ءَ دمگی انوگیں جاور ھال آنی سر ءَ سک باز گپ ءُ تران کت ءُ دمگ ءَ برجاھیں جنگ ءِ زوت ءُ دائمی ھلاسی ءِ استیں راہ ءُ در آنی سر ءَ ھم ھیال ءُ لیکہ کت۔ وزیر خارجہ آں اے گپ ءِ سرا جیڈھ ءِ درشانی کت کہ برجاھیں جنگ ءُ جیڑہ ءِ سبب ءَ دمگ ءِ تہ ءَ انسانی زند ءُ روزگار ءِ سر ءَ ھرابیں اثر کپگ ءَ انت کہ اے گپ سک باز افسوس ءِ گپ انت۔ دری کارانی وزیراں اے گپ ءِ سر ءَ تپاک کت کہ اے جنگ کس ءِ نپ ءَ نہ اِنت ءُ ایوک ءَ مرگ ءُ بربادی ءِ آسر ءَ بیت۔ اے نگیگیں جاوراں مسلمان امت ءِ تپاکی سک باز المی انت۔ نائب مزن وزیر ءُ دری کارانی وزیر اسحاق ڈار ءَ اسلام آباد ءَ امریکہ ءُ ایران ءِ استیں گپ ءُ تران ءِ آسر آنی بابت ءَ تر ءُ تاب کنوکیں دری کارانی وزیر آناں سرپدی دات ءُ تر ءُ تاب کنوکیں دری کارانی وزیر آناں اے گامگیج ءِ سرجمیں کمک ءِ درشان کت۔ مشاورتی دیوان ءَ بہر زوروکیں درئی کارانی وزیر آں جاور ھال آناں کنٹرول ءِ تہ ءَ دارگ، گیشی ءِ ھترہ آناں کم کنگ ءُ سیادی داروکیں فریق آنی نیام ءَ بامردیں گپ ءُ تران ءِ واستہ سازگاریں چاگرد ءِ جوڑ کنگ ءِ واستہ وتی عزم ءِ پدا زور دات۔ دری کارانی وزیراں اے گپ ءِ سر ءَ زور پر دات کہ گپ ءُ تران ءُ سفارتکاری تنازعات ءِ ھلاسی ءُ دمگی امن ءُ ایمنی ءِ دیمروئی ءِ واستہ یکیں زندگ داروکیں راہ اِنت ءُ اقوام متحدہ ءِ منشور ءِ اصول آنی سر ءَ عمل کنگ ءِ لوٹ کت کہ ایشی ءِ تہ ءَ درستیں ملک آنی حاکمیت ءُ سرزمین ءِ یکوئی ءِ احترام ھوار اِنت۔ دری کارانی وزیر آں چاریں براتیں ملک آنی نیام ءَ وت مہ وتی کمک ءَ را گیش مھکم کنگ ءِ راہ آنی سر ءَ ھم ھیال ریچی کت۔ نائب مزن وزیر ءُ وزیر ءِ درئی کار ءَ سعودی عرب، ترکیہ ءُ مصر ءِ براتیں ملک آنی درئی کار آنی وزیر آنی دل ءِ تہ ءَ چہ پڑ ءَ امن ءِ واستہ پاکستان ءِ کوشست آناں کمک کنگ ءِ واستہ دل ءِ تہ ءَ چہ منت واری ءِ درشانی کت۔ سعودی ءِ درئی کارانی وزیر شہزادہ فیصل بن فرحان، ترکیہ ءِ درئی کارانی وزیر ھاکان فیدان ءُ عرب جمہوریہ مصر ءِ درئی کارانی وزیر ڈاکٹر بدر عبدالعاطی ءَ مزن وزیر محمد شہباز شریف ءَ گوں ھم گند ءُ نند کتگ۔ دری کارانی وزیر آں مزن وزیر ءَ را میاں اوستمانی تک ءَ برجاھیں جاور ھال آنی ھوالگ ءَ وتی وتی ملک آنی لیکہ آنی بابت ءَ سرپد کت۔ پاکستان ءِ جوڑیشت ءُ جوانیں کرد ءِ ستا ءَ کنان ءَ آہاں اے گرانیں وھد ءِ تہا مزن وزیر، نائب مزن وزیر ءُ فیلڈ مارشل سید عاصم منیر ءِ سروکی ءَ را خراج تحسین پیش کت۔\932