پاکستان ءُ مصر ءَ میاں اوستمانی تک ءَ جیڑھانی گیش ءُ گیوار ، صبر ءُ اوپار ءِ ضلورت ءِ سر ءَ زور پر داتگ

اسلام آباد۔29مارچ (اے پی پی): پاکستان ءُ مصر ءَ گپ ءُ تران ءُ سفارتکاری ءِ وسیلگ ءَ میاں اوستمانی تک ءَ جیڑھانی ھلاسی، صبر ءُ گیواری ءِ ضلورت ءِ سر ءَ زور پر داتگ۔ یک شمبے ءِ روچ ءَ درئی کارانی کارگس ءِ نیمگ ءَ جاڑی بوتگیں بیان ءِ رد ءَ عرب جمہوریہ مصر ءِ دری کارانی وزیر ڈاکٹر بدر عبدالعاطی ءَ نائب مزن وزیر ءُ دری کارانی وزیر سینیٹر محمد اسحاق ڈار ءَ گوں گند ءُ نند کت۔ نائب مزن وزیر ءُ وزیر ءِ درئی کار ءَ مصر ءِ درئی کار ءِ وزیر ءَ را گرمیں وش اتک کت ءُ اے گپ ءِ پدا زور دات کہ پاکستان مصر ءِ گوما وتی دیریں ءُ براتی سیادی ءَ را سک باز ارزشت دنت کہ ایشی ءِ بنیات یکجائی راجدپتر، یکجائی مذہب ءُ دمگی ءُ میاں اوستمانی جیڈھ آنی سر ءَ یک وڑیں ھیال ءُ لیکہ آنی سر ءَ انت۔ دوئیں نیمگ ءَ دو نیمگی سیادی ءِ درستیں تک ءُ پھنات آنی سر ءَ چار ءُ تپاسی کت ءُ گوستگیں مزنیں تک ءِ تبادلہ ءِ وسیلگ ءَ پیداکیں جوانیں رپک ءِ سر ءَ دل یکیمی ءِ درشان کت، ایشی ءِ تہ ءَ نومبر 2025ءَ مصر ءِ دری کارانی وزیر ءِ پاکستان ءِ تر ءُ تاب ھم ھوار اِنت۔ دوئیں دری کارانی وزیر آں دو نیمگی بیپاری ءُ سرمایہ کاری سیادی ءَ را گیش کنگ ءِ ضلورت ءِ سر ءَ زور پر دات۔ آہاں مشترکہ وزارتی کمیشن ءَ ھوار باہمی میکانزم ءَ را چالو کنگ ءِ ارزشت ءِ سر ءَ تپاک کت ءُ کاروباری تک ءَ رابطہ آناں دیمروئی دیگ ءِ سر ءَ ھم تران کت۔ نائب مزن وزیر ءُ دری کارانی وزیر ءَ جان سلامتی ءِ شوبگ ءَ مصر ءِ برجاھیں کمک ءِ توسیپ کت، ایشی ءِ تہ ءَ ہیپاٹائٹس سی ءِ گر ءُ دار ءِ وڑیں گامگیج ھوار اَنت ءُ اے پڑ ءَ برجاھیں کمک ءِ وش آتک کت۔ دوئیں نیمگ ءَ دفاعی ءُ سیکورٹی کمک ءِ جوانیں رھشونی ءِ سر ءَ دل یکیمی ءِ درشان کنگ ءُ تربیتی تبادلہ ءُ ایندگر ادارگی میکانزم ءِ وسیلگ ءَ کمک ءَ را گیش مھکم کنگ ءِ سر ءَ تپاک کنگ بوتگ۔ ایشانی تہا دمگی ءُ میاں اوستمانی دیمروئی ءُ ھاسیں رنگ ءَ میاں اوستمانی جاور ھال آنی سر ءَ گپ ءُ تران کنگ بوت۔ ایشاں کش ءُ گوری آناں کم کنگ، صبر ءُ اوپار ءِ درشان کنگ ءُ جیڑھ آناں گپ ءُ تران ءُ سفارتکاری ءِ وسیلگ ءَ گیش ءُ گیوار کنگ ءِ ضلورت ءِ سر ءَ زور پر دات۔ نائب مزن وزیر ءُ درئی کارانی وزیر ءَ فلسطین ءِ اُلس ءِ واستہ پاکستان ءِ بے دروریں کمک ءِ یک رندے پدا گوشت ءُ غزہ ءُ مغربی کنارہ ءَ اسرائیل ءِ قبضہ گیریں اُرد آنی نیمگ ءَ برجاھیں زوراکی ءِ سر ءَ سک باز مذمت کت۔ آئی ءَ غزہ ءَ را انسانی کمک ءِ پجارینگ ءِ تہ ءَ مصر ءِ کرد ءِ توسیپ کت ایشی ءِ تہ ءَ پاکستان ءِ نیمگ ءَ چہ کمکی کار آنی کمک ھم ھوار اِنت۔ ایشاں اقوام متحدہ ءُ او آئی سی ءَ ھوار کثیر جہتی فورم آنی تہ ءَ نزیکیں ھمگرنچی ءَ را برجاہ دارگ ءِ سر ءَ ھم تپاک کتگ۔ گند ءُ نند ءَ پاکستان ءُ مصر ءِ نزیکیں ءُ براتی سیادی آناں گیش مھکم کنگ ءُ وت مہ وتی نپ ءِ توامیں شوبگ آنی تہ ءَ کمک ءَ را دیمروئی دیگ ءِ واستہ یکجائی جزم ءِ سر ءَ زور پر دات۔ مصر ءِ درئی کارانی وزیر ءِ پاکستان ءِ تر ءُ تاب 19مارچ ءَ ریاض ءَ بوتگیں گپ ءُ تران ءُ انوگیں مزنیں تک ءِ رابطہ آنی برجاہ دارگ اِنت ءُ اے دمگ ءِ بدل بوھوکیں جاور ھال آنی سر ءَ پاکستان ءُ مصر ءِ نیام ءَ نزیکیں ھمگرنچی ءِ درشان اِنت۔