نائب مزن وزیر محمد اسحاق ڈار ءَ ترکی ءِ درئی کارانی وزیر ھاکان فیدان  ءَ گوں گند ءُ نند کتگ، دمگی جاور ھال آنی سر ءَ گپ ءُ تران کتگ، نزیکیں ھمگرنچی ءُ اسٹریٹجک شریکداری ءَ را گیش گہتر کنگ ءِ واستہ یکجائی ءَ کار کنگ ءِ برجاہ دارگ ءِ سر ءَ تپاک

اسلام آباد۔29مارچ (اے پی پی): جمہوریہ ترکی ءِ درئی کارانی وزیر ہاکان فیدان  ءَ درئی کارانی کارگس ءَ نائب مزن وزیر ءُ درئی کارانی وزیر سینیٹر محمد اسحاق ڈار ءَ گوں گند ءُ نند کت۔ یک شمبے ءِ روچ ءَ دری کارانی وزارت ءِ نیمگ ءَ جاڑی بوتگیں بیان ءِ رد ءَ ترکی ءِ دری کارانی وزیر ھاکان فیدان  سعودی عرب ءُ مصر ءِ دری کارانی وزیر آنی گوما پاکستان ءِ تر ءُ تاب ءَ انت تانکہ دمگ ءِ بدل بوھوکیں جاور ھال ءُ کش ءُ چیل ءِ کم کنگ ءِ برجاھیں کوشست آنی ھوالگ ءَ شور ءُ سلاھ کنگ بہ بیت۔ گند ءُ نند ءِ ساھت ءَ نائب مزن وزیر ءُ دری کارانی وزیر محمد اسحاق ڈار ءَ پاکستان ءُ ترکی ءِ نیام ءَ یکجاھیں راجدپتر ، دود ءُ ربیدگ ءُ وت مہ وتی شرپ ءِ بنیات ءِ سر ءَ راجدپتری ءُ براتی سیادی ءِ سر ءَ زور پر دات۔ آئی ءَ دو نیمگی سیادی ءِ جوانیں رھشونی ءِ سر ءَ دل یکیمی ءِ درشان کت ءُ وت مہ وتی مفاد ءِ توامیں شوبگ آنی تہ ءَ ترکی ءِ گوما کمک ءَ را گیش کنگ ءِ واستہ پاکستان ءِ جزم ءِ سر ءَ زور پر دات۔ گپ ءُ تران ءَ چہ دو نیمگی سیادی آنی توامیں تک ءُ پھنات آنی چار ءُ تپاسی ءِ موہ رست ءُ دوئیں براتیں ملک آنی نیام ءَ دیریں اسٹریٹجک شریکداری ءَ را گیش مھکم کنگ ءِ راہ ءُ در آنی شوھازگ بوت۔ دوئیں رہشوناں دمگ ءِ نوکیں جاور ھال آنی سر ءَ ھم گپ ءُ تران کت ءُ ایران ءِ تہ ءَ دیمروئی کنوکیں جاور ھال آنی سر ءَ ھم گپ ءُ تران کت ءُ امن ءُ ایمنی ءِ دیمروئی ءِ واستہ گپ ءُ تران ءُ برجاھیں سفارتی ھوار بوھگ ءِ ارزشت ءِ سر ءَ زور پر دات۔ دوئیں رہشوناں یک دومی ءِ بنیاتی راجی مفاد آنی واستہ وتی بے مٹیں کمک ءِ پدر کنگ ءَ پد پاکستان ءُ ترکی ءِ نیام ءَ اسٹریٹجک شریکداری ءَ را گیش گہتر کنگ ءِ واستہ نزیکیں رابطہ کاری ءِ برجائی ءُ یکجائی ءَ کار کنگ ءِ سر ءَ تپاک کتگ۔