ایران ءَ ھوار براتیں مسلمانیں ملکانی تہا برجاھیں تناؤ ءِ ھلاسی ءِ ھاترا یکجائی کوشست المی انت، مزن وزیر شہباز شریف

اسلام آباد۔29 مارچ (اے پی پی): ایران ءَ ھوار براتیں مسلمانیں ملک آنی تہ ءَ برجاھیں کش ءُ چیل ءِ ھلاسی ءِ واستہ یکجائی کوشست المی اِنت، پاکستان ایران ءُ امریکہ ءَ را گپ ءُ تران ءِ میز ءِ سر ءَ آرگ ءِ واستہ جوانیں کرد ءَ برجاہ دار ایت، وھدے کہ ترکی ءُ مصر ءِ درئی کارانی وزیر آناں پاکستان ءِ جوڑیشت ءُ جوانیں کرد ءِ ستا کرتگ۔ یک شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ را ترکی ءِ درئی کارانی وزیر ھاکان فیدان ءُ عرب جمہوریہ مصر ءِ درئی کارانی وزیر ڈاکٹر بدر عبدالعتی ءَ مزن وزیر گس ءَ گند ءُ نند کتگ۔ اے موہ ءِ سر ءَ نائب مزن وزیر ءُ دری کارانی وزیر سینیٹر محمد اسحاق ڈار، راجی سلامتی ءِ مشیر لیفٹیننٹ جنرل محمد عاصم ملک، اسپیشل اسسٹنٹ طارق فاطمی ءُ دری کارانی سیکرٹری سفیر آمنہ بلوچ ھم ساڑی اتنت۔ گرم ءُ دلپھکی ءِ چاگرد ءَ بوتگیں گند ءُ نند ءِ ساھت ءَ مزن وزیر ءَ ترکی ءِ صدر رجب طیب اردوان ءُ مصر ءِ صدر عبدالفتاح السیسی ءَ را وتی نیکیں واھگ ءُ نیک راھی ءِ درشانی کت ءُ دوئیں سروک آنی گوما گوستگیں گپ ءُ تران ءِ ھم ذکر کت۔ مزن وزیر ءَ شرپداریں مہمان آناں پاکستان ءِ سفارتی کوشست آنی بابت ءَ سرپد کت ءُ اے گپ ءِ سر ءَ زور پر دات کہ ایران ءَ ھوار بازیں براتیں مسلمانیں ملک آنی تہ ءَ جاری جیڈھ آناں ھلاسی ءِ واستہ یکجائی کوشست المی اِنت کہ ایشی ءِ آسر ءَ گران بہائیں جانی، معیشت ءُ مال ءِ مزنیں تاوان بوھگ ءَ اِنت۔ آئی ءَ وتی جزم ءِ یک رندے پدا گوشت کہ پاکستان ایران ءُ امریکہ ءَ را گپ ءُ تران ءِ ٹیبل ءِ سر ءَ آرگ ءِ واستہ جوانیں کرد ءَ برجاہ دار ایت۔ دری کارانی وزیر آں مزن وزیر ءَ را میاں اوستمانی تک ءَ برجاھیں جاور ھال آنی ھوالگ ءَ وتی وتی ملک آنی لیکہ آناں سرپد کت۔ پاکستان ءِ جوڑیشت ءُ جوانیں کرد ءَ را ساڑہ کنان ءَ آہاں اے گرانیں وھد ءَ مزن وزیر، نائب مزن وزیر ءُ فیلڈ مارشل سید عاصم منیر ءِ سروکی ءَ را خراج تحسین پیش کت۔