پاکستان ایران ءِ گوما اوشتاتگ، گپ ءُ تران ءِ وسیلہ ءَ گیواری ءِ کوشست برجاہ انت، نائب مزن وزیر اسحاق ڈار

اسلام آباد۔3مارچ  (اے پی پی): نائب مزن وزیر ءُ درئی کارانی وزیر سینیٹر  محمد اسحاق ڈار ءَ گوشت کہ پاکستان دل ءِ جہلانکی ءَ گوں ایران ءِ ھمراھی ءَ اوشتاتگ، ملک ءِ اندر ءَ اے جیڈھ ءَ را ردیں رنگ دیئگ جاگہ ​​نہ اِنت، پاکستان مُدام کوشست کنگ ءَ اِنت کہ فرانس ءَ را گپ ءُ تران ءِ واستہ ٹیبل ءِ سر ءَ آرگ بہ بیت۔ سئے شمبے ءِ روچ ءَ گند ءُ نند ءَ آئی ءَ گوشت کہ 28فروری ءَ پاکستان ءَ ایران ءِ سر ءَ اُرش ءِ سر ءَ اولی سرکاری پسو داتگ، وھدیکہ مزن وزیر شہباز شریف ءَ یکم مارچ ءَ آیت اللہ علی خامنہ ای ءِ شہیدی ءِ سر ءَ دلپدردی کلوہ جاڑی کتگ۔ وزیر ءِ درئی کار ءَ گوشت کہ پاکستان ءَ ھمک فورم ءَ اے لیکہ  زرتگ کہ اے جیڈھ ءَ را میاں اوستمانی کانود ءُ گپ ءُ تران ءِ وسیلگ ءَ گیوار کنگ بہ بیت۔ اسحاق ڈار ءَ گیش گوشت کہ گوستگیں سئے روچ آنی تہ ءَ آئی ءَ بازیں ملک آنی گوما رابطہ کتگ ءُ عمان ءِ دری کارانی وزیر ءِ گوما ھم سرجمیں رنگ ءَ گپ ءُ تران کتگ، ایشی ءِ تہ ءَ اے گپ ءِ درشانی کنگ بوتگ کہ اے جیڈھ گپ ءُ تران ءِ وسیلگ ءَ گیش ءُ گیوار کنگ بوت کنت۔ آئی ءَ یات کت کہ جون ءَ ایران ءِ سر ءَ اُرش کنگ بوتگ ءُ ھما وھد ءَ ھم پاکستان ءَ ترکی، سعودی عرب، امارات، گتر  ءُ یورپی یونین ءَ ھوار بازیں ملکاں گوں اے جیڈھ ءِ گیش ءُ گیوار ءَ رابطہ کتگ۔ آئی ءَ اے گپ ءِ سر ءَ زور پر دات کہ ایران پاکستان ءِ براتیں اسلامی ءُ ھمساھگیں ملک اِنت ءُ پاکستان وتی زمہ واری پیلو کنگ ءَ بوتگ ءُ دیمتر ءَ ھم پیلو کنت۔ وزیر ءِ درئی کار ءَ گوشت کہ ایران ءَ وت اے گپ پدر کتگ کہ آ ایٹمی سلاہ جوڑ نہ کنت ءُ دراہیں جیڈھ گپ ءُ تران ءُ سفارتی چینل آنی وسیلگ ءَ گیش ءُ گیوار کنگ بنت۔ پاکستان ءِ میانجی داری ءِ پیشکش ءِ سر ءَ ایران ءِ پسو جوانیں بوتگ۔ اسحاق ڈار ءَ گوشت کہ امریکہ ءُ اسرائیل ءِ نیمگ ءَ ایران ءِ سر ءَ اُرش ءُ ایشی ءِ پسو ءَ خلیج ءِ ملک آنی سر ءَ ایران ءِ اُرش ءَ پد پیداک بوتگیں جاور ھال آنی سر ءَ پاکستان ءَ ھاسیں موقف زرتگ۔ پاکستان ءَ ایران ءِ ایٹمی توانائی ءِ امنیں کارمرز کنگ ءِ حق ءِ حمایت کتگ ءُ ایوکیں ملک بوتگ کہ آئی ءَ ایران ءِ سرا اُرش ءَ را سرکاری رنگ ءَ مذمت کتگ۔ آئی ءَ گوشت کہ 12سال ءَ پد اقوام متحدہ ءِ سلامتی کونسل ءَ یک قرارداد ءِ تپاکی ءَ گوں منظور کنگ بوتگ ایشی ءِ تہ ءَ ایران ءِ سر ءَ بندش آناں دیر کنگ ءِ لوٹ کنگ بوتگ ۔ پاکستان ءَ 28 فروری ءَ سلامتی کونسل ءِ ہنگامی دیوان گوانک جتگ ءُ ایران ءِ سرا اُرش ایر جتگ۔ آئی ءَ اے گپ پدر کت کہ حکومت دمگ ءَ  ایمنی ءُ  برجائی ءُ جیڈھ آناں سفارتی وسیلگ ءَ چہ گیش ءُ گیوار کنگ ءِ کوشست آنی تہ ءَ سرجمی ءَ گوں بندوک اِنت۔