پاکستان چائنا انسٹیٹیوٹ  ءِ نیمگ ءَ ”آسیان ءَ چہ پاکستان ءَ سولر پی وی ویلیو چین مینوفیکچرنگ ءِ واستہ چینی سرمایہ کاری ءِ راجینگ“ ءِ سر ءَ دمگی کانفرنس ءِ بندوبست

اسلام آباد۔3مارچ  (اے پی پی): پاکستان چائنا انسٹی ٹیوٹ ءَ ’’گرین سی پیک الائنس‘‘ ءِ چیر دستی ءَ دمگی کانفرنس ءِ برجم دارگ بوت کہ ایشی ءِ سرھال ’’آسیان ءَ چہ پاکستان ءَ سولر پی وی ویلیو چین مینوفیکچرنگ ءِ واستہ چینی سرمایہ کاری ءَ را راجیگ کنگ‘‘ اِنت۔ اے دیوان ءَ پالیسی ساز ءُ دمگی ماہرین یکجاہ بوتگ انت تانکہ جنوب مشرقی ایشیائی ملک آنی شمسی توان ءِ جوڑ کنگ ءِ تجربگ آناں پاکستان ءِ واستہ عملی سبق آنی تہ ءَ بدل کنگ بہ بیت۔ ایگزیکٹو ڈائریکٹر پاکستان چائنا انسٹی ٹیوٹ مصطفیٰ حیدر سید ءَ گوشت کہ شمسی توان ءِ جوڑ کنگ ءِ توازن ءِ تہ ءَ جھان ءِ تک ءَ بدلی، آسیان ءِ تہ ءَ پوسٹ ٹیرف ایڈجسٹمنٹ ءُ چین ءِ اوورسیز کلین ٹیک ڈرائیو ءِ سر ءَ چمشانک دیگ بوتگ۔ آئی ءَ اے گپ ءِ پدر کنگ ءَ گوشت کہ گرین سی پیک الائنس اے گپ ءُ تران ءِ بندوبست ھما وھد ءَ کنگ ءَ اِنت کہ ملک صنعتی پالیشی ءُ معتبریں سپلائی ءِ بنیات ءَ سولر پی وی ویلیو چین سرمایہ کاری ءَ را وتی نیمگ ءَ رازیگ کنگ ءِ واستہ یکے دومی ءِ گوما مقابلہ کنگ ءَ اَنت۔ آئی ءَ اے گپ ءِ سر ءَ دیم دات کہ مینوفیکچرنگ ءِ پیسلہ آناں عملی رنگ ءَ منافع بخش جوڑ کنگ ءِ رھبند چے اِنت، ایشی ءِ تہ ءَ پالیسی ءِ رد ءَ ھاسیں اقتصادی زون آنی جوڑیشت ءُ دیمروئی ءُ سرمایہ کاری ءِ واستہ آسراتی آنی پھجارینگ ھوار اِنت۔ پاکستان چائنا انسٹی ٹیوٹ ءِ چیئرمین سینیٹر مشاہد حسین سید ءَ اے گپ ءِ سر ءَ زور پر دات کہ پاکستان ءَ شمسی توانائی ءِ دیمروئی چین ءِ صنعتی طاقت ءِ سر ءَ گیش ءَ چہ گیش انحصار کنگ ءَ اِنت۔ آئی ءَ گوشت کہ 2024 ءَ 17گاواٹ ءُ مالی سال 2025 ءَ 17.9گاواٹ شمسی پینل درآمد کنگ بوتگ ایشی ءَ چہ ستمبر 2025 ءَ تاں کلیں درآمد 50گاواٹ ءَ چہ گیش بوتگ۔ سیکورٹی ءِ ھاتر ءَ گشتگ کہ جنوری ءُ اپریل 2025 ءِ نیام ءَ پاکستان ءِ 25.3درسد بجلی ءِ ضلورت شمسی توانائی ءِ وسیلگ ءَ پیلو کنگ بوتگ۔ آئی ءَ اے ھم ھال داتگ کہ اگاں چہ 2024 ءَ 0.07 ءَ چہ 0.09 ڈالر فی واٹ ءِ نرخ اتکگ ات بلے پیداوار ءِ کمی ءُ پالیسی ءِ بدلی ءِ سبب ءَ 2025 ءِ گڈ ءَ تاں نرخ 9 درسد گیش بوھگ ءِ امکان انت۔ آئی ءَ گیش گوشت کہ چین ءِ تہ ءَ 80درسد ءَ چہ گیش شمسی توان ءِ جوڑ کنگ ءِ گنجائش ھوار اِنت ایشی ءِ تہ ءَ 50ارب ڈالر ءَ چہ گیش سرمایہ کاری ھوار اِنت۔ آئی ءَ شمسی جیو پولیٹیکس ءَ را آپ ءُ وسیلگ آنی گوما ھم ھمگرنچ کتگ ءُ گوشت کہ دسمبر 2024ءَ تاں نیٹ میٹرنگ ءِ گاہک آنی کساس 283ہزار ءَ سر بوتگ وھدیکہ 650ہزار سولر ٹیوب ویل آنی سبب ءَ 2023ءَ چہ برنج ءِ کشت ءُ کشار ءَ 30درسد گیشی بوتگ۔ موسمیاتی مٹ بدلی ءِ وزیر مملکت ڈاکٹر شازرہ منصب علی کھرال ءَ گوشت کہ پاکستان ءَ شمسی توان ءِ لوٹ سرجمی ءَ درآمد آنی سر ءَ بندوک اِنت۔ آئی ءَ گوشت کہ نومبر 2025 ءَ تاں چین ءَ چہ 51.5 گیگاواٹ ءِ کساس ءَ سولر ماڈیول درآمد کنگ بوتگ آئی ءَ لاہور، فیصل آباد ءُ سیالکوٹ ءِ وڑیں شہر آنی تہ ءَ روچ ءِ وھد ءَ بجلی ءِ لوٹ ءِ تہ ءَ کمی ءِ رجحان ءِ حوالہ داتگ کہ ایشی ءَ چہ مارکیٹ ءِ اصلاحات ءِ واستہ دباؤ گیش بوھگ ءَ اِنت۔ آئی ءَ درملکی زرّ ءِ بچت ءِ واستہ مینوفیکچرنگ ءَ را المی لیک اتگ ءُ گوشت کہ درآمد ءِ ھرچ ءُ درچ جون 2025ءَ تاں 2ارب ڈالر ءَ چہ گیش بوتگ۔پاکستان چین انسٹی ٹیوٹ ءِ سینئر ریسرچ ایسوسی ایٹ محمد عمر فاروق ءَ گوشت کہ گلوبل سولر ویلیو چین نوں انچیں پڑ ءَ انت کہ تجارتی پالیشی ءُ جیو پولیٹیکس ءِ پیسلہ ءِ سر ءَ بازیں اثر ءُ رسوخ بوھگ ءَ انت۔ آئی ءَ اے گپ ءِ سر ءَ زور پر دات کہ پاکستان ءِ واستہ موہ کم کم ءَ بنجاہی پیداوار ءَ را دیمروئی دیگ ءَ انت۔ گریفتھ ایشیا انسٹی ٹیوٹ ءِ ڈائریکٹر ڈاکٹر کرسٹوف نیڈوپیل ءَ ہما جاور ھال آنی سر ءَ تران کت کہ آسیان ءَ را چینی مینوفیکچررز ءِ واستہ دلکش جوڑ کتگ۔ آئی ءَ پاکستان ءَ را پالیسی ءِ استحکام ءُ سرمایہ کارانی رکھینگ ءَ را اولی ترجی ءَ دیگ ءِ پنت ءُ شون کت۔ سی ایس اے آئی ایل ءِ سینئر ایڈوائزر ن اے زوبری ءَ گوشت کہ ایوک ءَ ترغیب ءِ وسیلگ ءَ ھچ نہ بیت، سرمایہ کار آناں تیزی ءُ یقین دہانی ءِ ضلورت اِنت۔ ڈاکٹر مارلسٹیا چترانینگرام (آئی ای ایس آر) ءَ انڈونیشیا ءِ مثال ءِ حوالہ دیگ ءَ دمگی صنعت ءُ درملکی سرمایہ کاری ءِ نیام ءَ توازن ءِ سرا زور پر دات۔ لام فام، انرجی (امبر) ءَ گوشت کہ آسیان ءَ تجارتی بندش آناں چہ بچگ ءِ واستہ چینی مینوفیکچرنگ ءَ را جاہ داتگ ءُ پاکستان ھم اے ماڈل ءَ چہ وتی برآمداتی مارکیٹ آناں تنوع ءِ واستہ دربرگ ءَ انت۔ سرمایہ کاری بورڈ ءِ ایڈیشنل سیکرٹری ڈاکٹر عارفہ اقبال ءَ ھاسیں اقتصادی زون آنی تہ ءَ رکاوٹ آناں دور کنگ ءُ 6 ءَ چہ 12ماہ ءِ تہ ءَ عملی گہتری آرگ ءِ سر ءَ دلگوشی دیگ ءِ جزم ءِ درشانی کت۔ ژو تیانچی (آر ڈی سی وائی) ءَ چینی نقطہ نظر ءَ چہ گوشت کہ نجی چینی مینوفیکچررز ءِ واستہ ڈی رسکنگ ءُ ھاسیں نفاذ ءِ میکانزم گیشتر المی انت۔ مارک لیسٹر (ایشیا کلین انرجی پارٹنرز) ءَ سوج دات کہ پاکستان ءَ پیسر ءَ ماڈیول اسمبلی ءَ چہ بندات کنگ بہ بیت ءُ پدا کم کم ءَ سیل ءُ ویفر جوڑ کنگ ءِ نیمگ ءَ روگ بہ بیت۔ لنہ ہوا، ویتنام ءِ وزارت توانائی ءَ ویتنام ءِ تجربات ءِ بابت ءَ شیئر کت کہ اودا منصوبہ گرڈ انضمام ءُ آمدنی ءِ رکھینگ ءِ وسیلگ ءَ سرمایہ کاری ءِ ھاتر ءَ چوں جوڑ کنگ بوتگ انت۔ کانفرنس ءَ تھنک ٹینک، میڈیا، پالیسی ساز ءُ نجی شعبہ ءِ نمائندگ آنی جوانیں رنگ ءَ بھر زوری بوتگ ات، ایشی ءِ مول ءُ مراد پاکستان ءَ شمسی توانائی ءِ صنعت ءِ جوڑ کنگ ءِ واستہ کاروباری حقیقت ءُ پالیسی ءِ اولویت آناں یکجا کنگ بوتگ ات۔