وزیراعلیٰ بلوچستان میر سرفراز بگٹی نا کماشی ٹی پسنی فش ہاربر نا بحالی و فعالیت نا بابت بڑزکو کہولی دیوان اس مس

کوئٹہ۔ 03 مارچ(اے پی پی )وزیراعلیٰ بلوچستان میر سرفراز بگٹی نا کماشی ٹی پسنی فش ہاربر نا بحالی وفعالیت نا بابت بڑزکو کہولی دیوان اس سے شنبے نادے آ داڑے مس ۔ ، ہراٹی ہاربر ءِ پورو ڑاٹ فعالیو ماہی گیری نا بشخ ءِ پوسکن آ خواست آتون ہم گرنچ کننگ نا امور تا سرجمی اٹ جاچ ءِ ہلنگا ۔ دیوان اٹی صوبائی اسمبلی نا باسک گوادر مولانا ہدایت الرحمٰن، چیف سیکرٹری بلوچستان شکیل قادر خان، ایڈیشنل چیف سیکرٹری شوناری و ڈٹ بندی زاہد سلیم، ایڈیشنل چیف سیکرٹری داخلہ حمزہ شفقات، سیکرٹری فشریز طارق قمر تون اوار ایلو محکمہ غاتا بڑزکو کمامدار آک بشخ ہلکُر۔ دیوان نا وخت آ وزیراعلیٰ ءِ پسنی فش ہاربر نا ساڑی آ حالیت، مون تروک چیلنج و بحالی نا گمانی لائحہ عمل آ حوال تننگا۔وزیراعلیٰ ہاربر ءِ پورو وڑ اٹ کاریم اٹ اتنگ و سوگو کننگ کن اسہ جامع فزیبلٹی رپورٹ اس بٹنگسا  پارت کرے کہ دا رپورٹ برجاسال مئی اسکان پیش کننگے تانکہ ڈٹ آتے عملی دروشم اس تننگ مرے۔ وزیراعلیٰ بلوچستان غیر کانودی ٹرالنگ آ سخت ترندی نا درشانیءِ کرسا تعلقدار ادارہ غاتے پیدوار پارت جاری کرے کہ ماہی گیر آتا حق آتا ہر وڑ اٹ رکّھ (تحفظ) ءِ پک کننگے و غیر کانودی سرجز آتا برخلاف بے پرخ کارروائی کننگے۔او پارے کہ سمندری وسیلہ غاتا رکّھ و ہندی ماہی گیر آتا زرگزرانی فائدہ غاتا دفاع حکومت نا اولیت ءِ ۔ او دا ہیت آ زور شاغا کہ پسنی فش ہاربر نا جوڑ جاڑ آن نہ بیرہ ہندی زرگزران سوگو مریک بلکن روزگار نا پین وارخواہیہم ودی مریک، ہراڑآن گوادر و ایلو کیبی علاقہ غاتا الس ءِ گچین ءُ فائدہ اس رسینگک۔ وزیراعلیٰ تعلقدار محکمہ غاتے پارت کہ غٹ گام گیج آتے شفافیت، پیشہ ورانہ مہارت و طے مروک آ وخت (ٹائم لائن) نا رِد اٹ پورو کننگے۔وزیراعلیٰ دا عزم انا درشانی ءِ کرے کہ حکومت بلوچستان صوبہ نا کرکی علاقہ غاتا شونداری ، ماہی گیری نا مون آ دننگ و سمندری زرگزران ءِ سوگو کننگ کن سوگو و دیرپا ءُ گام گیج آتے برجا تخک۔