پاکستان ریلویز نا کٹیا ٹی ودکی و کمرشل میرات آتا گچین و شفاف بست وبند کن عملی گام گیج آک جاری ءُ، بنجائی وزیر ریلوائی محمد حنیف عباسی

اسلام آباد۔ 03مارچ (اے پی پی) بنجائی وزیر ریلوائی محمد حنیف عباسی پارینے کہ پاکستان ریلویز نا کٹیا ٹی ودکی و کمرشل مال و مڈّی تاگچین و شفاف وڑ اٹ بست وبند کن عملی گام گیج آک جاری ءُ تانکہ دا قومی ادارہ نا مالی حالیت ءِ پین سوگو کننگ مرے۔سینیٹ نا دیوان اٹی سے شنبے نا دے پاکستان ریلویز نا مالی کارکڑد و کمرشل میرات آتا بابت اہم سرجم حاول آتے ایوان اٹ پیش کننگا۔ بنجائی وزیر ریلوائی تینا نوشتہی وڑ اٹ ورندی ٹی پارے کہ ریونیو ءِ وودفنگ کن فریٹو مسافر آپریشنز اٹی گچینی ، ڈغار و ایلو کمرشل مال و مڈّی تا گچین کاریم اٹ اتنگ و پبلک پرائیویٹ پارٹنرشپ نا وارخواہی تے مون آ دننگ آ چکار کننگ انگ ءِ ۔بنجائی وزیر نا رِد اٹ دا اصلاحات نا مسخت نئے بیرہ ریلوائی ءِ نسخان آن کشنگ ءِ بلکن اودے اسہ خودکفیل و کٹیا کروک ادارہ اس جوڑ کننگ ہم ارے تانکہ مسافر آتے گچین ءُ آسراتی اس فراوان کننگ مرے و قومی زرگزران اٹی ادارہ نا کارکڑد پین گچین مرے۔ تدوک آ مسہ سال آتیٹی ریلوائی نا کٹیا ٹی نمان ودکی ریکارڈ کننگانے۔سرجم حوال آتا رِد اٹ مالی سال 22-2021 اٹی فریٹآپریشنز نا کٹیا 23 ارب 12 کروڑ روپئی ئس، ہرا مالی سال 24-2023 اٹی ودسا 28 ارب 11 کروڑ روپئی مس۔ ہندن مسافر آپریشنز آن مروک آ کٹیا تدوک آ مسہ سال آتیٹی 30 ارب روپئی آن ودسا 49 ارب روپئی اسکان سرمس۔بنجائی وزیر ایوان ءِ معلومدار کرے کہ ریلوائی نا لیز آ تروک آ ڈغار آن تدوک آ چار سال آتیٹی 13 ارب روپئی نا ریونیو دوئی مس۔ کمرشل جائیداد آتا بابت حوال ترسا پاننگاکہ مچ آ ملک اٹی ساڑی 34 ہزار 763 کمرشل یونٹ آتیٹی 2 ہزار 355 یونٹ آ دا وخت آ ناروا کوزہ گیر آتا کوزہ ٹی ءُ۔