مزن وزیر محمد شہباز شریف ءَ شام ءِ صدر احمد الشرع ءَ گوں ٹیلی فون کتگ، دمگی امن ءُ ایمنی ءِ برجائی ءِ واستہ تحمل، کشاں چیل ءِ کم کنگ ءُ گپ ءُ تران ءِ زوتیں ضلورت ءِ سر ءَ زور پر داتگ

اسلام آباد۔ 2 مارچ (اے پی پی): مزن وزیر محمد شہباز شریف ءُ شام ءِ صدر احمد الشرع ءَ اسرائیل ءِ ایران ءِ سر ءَ اُرش ءُ ایشی ءِ آسر ءَ خلیج ءِ دمگ ءَ اُرش آنی پد ءَ ھترناکیں دمگی کش ءُ چیل آنی سر ءَ گپ ءُ تران کتگ ءُ دمگی امن ءُ ایمنی ءِ برجائی ءِ واستہ تحمل، کش ءُ چیل ءِ کمی ءُ گپ ءُ تران ءِ زوتیں ضلورت ءِ سر ءَ زور پر داتگ۔ دو شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ گوں شام ءِ صدر احمد الشرع ءَ ٹیلی فون کتگ۔ گپ ءُ تران ءِ ساھت ءَ دوئیں رھشوناں ایران ءِ سر ءَ اسرائیل ءِ اُرش ءَ پد دمگی ھترناکیں جیڑھ ءُ پد ءَ خلیج ءِ دمگ ءَ اُرش آنی سر ءَ گپ ءُ تران کتگ۔ آہاں دمگی امن ءُ ایمنی ءِ برجائی ءِ ھاتر ءَ تحمل، ڈی اسکالیشن ءُ گپ ءُ تران ءِ زوتیں ضلورت ءِ سر ءَ زور پر دات۔ مزن وزیر ءَ شام ءِ صدر ءَ را استیں بحران ءِ درگت ءَ پاکستان ءِ سفارتی رسائی ءِ بابت ءَ سرپد کت ءُُ خطہ ءَ امن ءُُ ایمنی ءِ بحالی ءِ واستہ جوڑیشت ءِ واستہ پاکستان ءِ تیاری ءِ پدا زور دات۔ گپ ءُ تران ءِ تہ ءَ میاں اوستمانی جاورانی ھواری ءَ اوگانستان ءِ انوگیں جاورانی سر ءَ ھم گپ ءُ تران کنگ بوت۔ دوئیں رہشوناں پاکستان ءُُ شام ءِ نیام ءَ دیریں براتی سیادی ءِ سر ءَ دل یکیمی ءِ درشانی کت ءُ دمگی دیمروئی آنی سر ءَ نزیکیں رابطہ ءِ برجاہ دارگ ءِ وھد ءَ وت مہ وتی مفاد ءِ پڑ آنی تہ ءَ کمک ءَ را گیش کنگ ءِ سر ءَ تپاک کت۔