بھارت جنگ ءِ میدان ءَ چہ گپ ءُ تران ءِ نیمگ ء بیئت اگاں نہ ذلت ءِ واستہ تیار بہ بیت، پاکستان ءَ بھارت ءُ اوگانستان ءَ را وتی صلاحیت آنی یک جھلکے پیش داشتگ، صدر آصف علی زرداری ءِ نوکیں پارلیمانی سال ءِ بندات ءَ پارلیمنٹ ءِ یکجائی دیوان ءَ گوں تران

اسلام آباد۔ 2 مارچ (اے پی پی): جنگ ءَ را گڈی راہ لیکگ ءَ صدر آصف علی زرداری ءَ بھارت ءَ را زور پر داتگ کہ آ جنگ ءِ میدان ءَ چہ گپ ءُ تران ءِ نیمگ ءَ بیئت اگاں نہ دگہ ذلت واستہ تیار بہ بیت. پاکستان بھارت ءُ اوگانستان ءَ را وتی صلاحیت آنی تہ ءَ ایوک ءَ یک جھلکے پیش داشتگ۔ نوکیں پارلیمانی سال ءِ بندات ءَ حاکمیت ءِ رکھینگ، ناشرکاری ءِ ھلاسی ءُ اقتصادی استحکام ءَ را گیش مھکم کنگ مئے اولی ترجی بہ بنت۔ دو شمبے ءِ روچ ءَ نوکیں پارلیمانی سال ءِ بندات ءَ پارلیمنٹ ءِ یکجائی دیوان ءَ وتی سالانہ گشتانک ءِ تہ ءَ صدر ءَ گوشت کہ آئی ءَ را شرپ رس ایت کہ دو رند ءَ گچین بوتگیں صدر ءِ بستار ءَ آئی ءَ نوکیں پارلیمانی سال ءِ بندات ءَ نوھمی رند ءَ اے شرپداریں ایوان ءَ گوں گشتانک دات۔ ھمک پتے مئے جمہوری نظام ءُ پاکستان ءِ تسلسل انت۔ اے پاکستان ءِ الس ءِ نمائندگ ءِ بستار ءَ مئے ذمہ واریانی یات انت ۔ صدر ءِ مملکت ءَ گوشت کہ راج نہ ایوک ءَ بحران آنی تہ ءَ بلکینگ ءَ المی موڑ آنی تہ ءَ ھم آزمائش کنگ بنت۔ گوستگیں سال ءَ مارا یات اتک کہ مئے جمہوریت ءِ زور آئین ءِ تہا انت، الس ءِ مھکم بوھگ، پارلیمنٹ ءُُ حکومت ءِ ذمہ واری ءُُ مئے سلاہ بندیں اُرد ءِ دلیری ءِ تہا انت۔ نوکیں پارلیمانی سال ءِ بندات ءَ مارا اے استحکام ءِ سر ءَ وتی حاکمیت ءِ رکھینگ ، آئینی حکومت داری ءَ را مھکم کنگ ءُُ اقتصادی بدلی ءَ را دیم ءَ برگ لوٹ ایت تانکہ استحکام ءَ را دیمروئی ءِ تہ ءَ بدل کنگ بہ بیت ءُُ ھر شہری ءِ واستہ وشھالی ، دیمروئی ءُُ امن ءِ وسیلگ جوڑ بہ بیت۔ صدر ءِ مملکت ءَ گوشت کہ مرچی ما وتی راجی راجدپتر ءِ جوڑ کنوک آنی ایر کتگیں بنیات آنی سر ءَ اوشتاتگ آں۔ قائداعظم محمد علی جناح ءَ آئین ءُ قانون ءِ حاکمیت ءِ سرا جمہوری ریاست ءِ تصور پیش کتگ۔ شہید ذوالفقار علی بھٹو ءَ راج ءَ یک تپاکی ءَ گوں آئین دات۔ شہید بانک بے نظیر بھٹو ءَ وتی قربانی ءُ مثالی رھشونی ءَ چہ جمہوری عمل ءَ را مہکم کت ۔ صدر ءِ مملکت ءَ گوشت کہ پارلیمنٹ ءِ بالادستی ءِ سر ءَ آئی ءِ ایمان ایوک ءَ گپ ءُُ تران ءَ گوں بندوک نہ اِنت بلکینگ ءَ عملی کار آنی تہ ءَ ھم پدر اِنت۔ آئی ءِ پیسریگیں صدارت ءِ مدت ءَ من یک نیمگی 1973 ءِ آئین ءِ رد ءَ پارلیمنٹ ءِ بوتگیں اختیارات آئی ءَ را پدا داتگ انت۔ تاریخی 18 ترمیم ءِ وسیلگ ءَ مرچی صدر ءِ ایوان فیڈریشن ءِ یکوئی ءِ علامت، وفاقی یونٹ آنی نیام ءَ پُل ءُُ آئینی کانود آنی سرپرست اِنت۔ صدر ءِ مملکت ءَ گوشت کہ گوستگیں دہ ماہ راج ءِ واستہ گہتریں ءُُ پیچیدہ چکاس بوتگ انت۔ ہر وھد ءَ کہ مئے حاکمیت ءَ را مشرقی یا مغربی سیمسر ءَ چیلنج کنگ بوت گڑا پاکستان ءَ گوں عقل ءُ صبر ءُ مھکمیں جزم ءَ پسو دات۔ بے سوبیں اُرشانی پسو ءَ مئے سلاہ بندیں اُرداں استثنائی پیشہ وارانہ ءُ نظم و ضبط ءِ درشانی کتگ۔ انصاف ءِ جنگ ءَ مئے سلاہ بندیں اُرداں ہندوستان ءِ اُرش ءَ را راجدپتری اسٹریٹجک سوبمندی ءِ تہا بدل کت۔ فروری ءِ شپ ءَ وھدے طالبان ءِ رژیم ءَ مغربی سیمسر ءِ سر ءَ اُرش گیش کت گڑا مئے سیکورٹی فورسز ءَ سرجمیں گامگیج زرت ءُ یک ھاسیں پیغامے دات کہ مئے وت واجہیں سرزمین ءِ سر ءَ ھچ وڑیں ارش برداشت کنگ نہ بیت۔ سیاسی قیادت یکجاہ بوتگ، راج مھکم بوتگ۔ من بندات ءَ وتی راج ءِ بہادریں مدافعین ءِ دل ءِ جہلانکی ءَ چہ منت واری ءِ درشان کناں۔ ہمے سبب انت کہ مرچی ما درست ایمن انت۔ اے سوبمندیں فوجی جنگاں چہ کسانیں یا دراجیں جنگاں مئے آرمی، ایئر فورس، نیوی، رینجرز، فرنٹیئر کور، پولیس ءُ انٹیلی جنس ادارہانی قربانی ایوک ءَ کساس ءَ گوں بندوک نہ بنت۔ ھمک شھید ءِ پد ءَ ھما ھاندان ءِ یلہ بیت کہ آئی ءَ پاکستان ءِ برجائی ءِ واستہ مزنیں قربانی داتگ۔ صدر ءِ مملکت ءَ گوشت کہ وہدے آ شہید آنی ھاندان ءَ گوں گند ءُُ نند کنت گڈا آئی ءَ ہما درد مار ایت کہ آئی ءَ وتی گہار شہید بانک بے نظیر بھٹو ءِ شہیدی ءِ وہد ءَ مار اتگ۔ اے ریاست ءِ ذمہ واری انت کہ آ اے ھانداناں گوں عزت ءُُ شرپ ءَ برجاہ بہ دار ایت۔ 2025 پاکستان ءِ واستہ یک موڑ ءِ ثابت بوت کہ حق ءِ جنگ ءِ تہا درپشناکیں فوجی سوبمندی ءَ درائیں زوراکی ءِ دیم ءَ کش ات ءُ روایتی برتری ءِ لیکہ ءِ ٹُکّر ٹُکّر کت۔ اے ایوک ءَ جنگی سوبمندی نہ بوتگ بلکیں راجی جزم ءِ درشان بوتگ۔ ما نہ ایوک ءَ فوجی بلکن ءَ سفارتی محاذ ءِ سر ءَ ھم سوبمندی زرتگ۔ صدر ءِ مملکت ءَ اے گپ پدر کت کہ پاکستان جموں ءُُ کشمیر ءِ الس ءِ وت واجئی ءِ عادلانہ حق ءِ سرجمی ءَ کمک ءَ برجاہ دار ایت۔ جنوبی ایشیا سرجمیں امن ءَ داں وھدیکہ کشمیری راج ءَ آجوئی ءِ رسگ ءَ نہ رس ایت۔ اگاں ھچ وڑیں زوراکی ءِ سرا زور دیگ بہ بیت گڑا آ دگہ ذلت آمیزیں شکست ءِ ھاترا تیار کنگ بہ بیت۔ بلے منی سوج ایش انت کہ جنگ ءِ بدل ءَ گپ ءُ تران ءِ راہ گرگ بہ بیت پرچہ کہ دمگی ایمنی ءِ یکیں راہ ہمیش انت۔ صدر ءِ مملکت ءَ گوشت کہ پاکستان یک زمہ واریں ایٹمی ریاست انت۔ ما وتی ذمہ واریاں سرپد ایں بلے اگاں لوٹ بوت گڑا مئے دفاع ءِ سرجمیں صلاحیت است انت۔ ما اوگانستان ءِ سرزمین ءَ چہ ناشرکاری ءِ سر ءَ تحمل ءِ درشان کتگ بلے ھچ ریاست ءَ را مدام اُرش برداشت کنگ مہ بیت۔ اقوام متحدہ ءِ منشور ءِ آرٹیکل 51 ءِ رد ءَ مارا وت ءَ دفاع کنگ ءِ حق است۔ ما وتی توانائیانی تہ ءَ ایوک ءَ یک بھرے پیش داشتگ۔ مئے زمین مقدس اِنت۔ ما ھچ مُلک ءُ گل ءَ اے موہ نہ دئیں کہ مئے زمین یا ھمساھگیں دمگاں پاکستان ءِ ھلاپ ءَ کارمرز بہ کنت۔ صدر ءِ مملکت ئَ گوشت کہ ما ایران ئِ سر ءَ برجاھیں جنگ ءَ را سک مذمت کناں ءُ آئی ئِ وت واجہی ءُ سرزمین ءِ یکوئی ئِ واستہ وتی کمک ءِ یک رند ءَ پدر کناں۔ ھمے رنگ ءَ ما خلیج ءِ براتیں ملکانی سر ءَ اُرش ایر جن ایں ۔ دمگ ءِ تہ ءَ استحکام ءُ میاں اوستمانی کانود ءِ احترام ناگزیر اِنت، ما ھما درستیں ملک آنی منت وار ایں کہ آھاں جنوبی ایشیا ءِ تہ ءَ دوئیں ایٹمی طاقت آنی نیام ءَ کش ءُُ چیل آنی تہ ءَ کمی ءِ تہ ءَ کرد پیلو کتگ۔ پاکستان . امریکہ ءِ گوما آہانی سیادی ءِ تہا نوکیں جہت دیم ءَ اتکگ انت وھدے کہ چین ءِ گوما مئے سیادی نوکیں بالاد ءَ سر بوتگ انت۔ سی پیک 2.0 پاکستان ءِ انفراسٹرکچر ءَ انقلاب کنت۔ صدر مملکت ءَ گوشت کہ ما فلسطینی الس ءِ حق ءَ وتی اصولی موقف ءِ سر ءَ اوشتاتگیں ءُ 1967ءَ چہ پیسر ءِ سیمسر آنی رد ءَ القدس الشریف ءِ دارالحکومت ءِ رد ءَ یک آجوئیں فلسطینی ریاست ءِ جوڑ کنگ ءِ حمایت ءَ برجاہ دار ایں ۔ صدر ءِ مملکت ءَ گوشت کہ آپ ءِ رکھینگ یک کلیدی اسٹریٹجک جیڈھ ءِ جوڑ بوتگ۔ سندھ ءِ آپانی معاہدے ءِ معطل کنگ ءُ آپ ءَ را سلاہ ءِ رنگ ءَ کارمرز کنگ یک بے دروریں خلاف ورزی یے ۔ ما ہر دیوان ءَ وتی آپی حقانی دفاع ءَ کنیں۔ فیڈریشن ءِ زور مرکزیت ءَ چہ نہ بلکیں ہم آہنگی ءَ چہ کیت، کونسل آف کامن انٹرسٹس ءِ وڑیں آئینی فورم فعال کنگ بہ بنت۔ بلوچستان ءِ محرومیاتانی گیواری ءُُ بنجاہی آبادی ءَ را توسعہ ءِ تہا ہوار کنگ مئے اولویت انت۔ آئی ءَ گوشت کہ اقتصادی برجائی راجی ایمنی ءَ گوں بندوک انت۔ مارا ٹیکس نیٹ ءَ را گیش کنگ لوٹیت، توانائی ءِ اصلاحات، زرعی دیمروئی ءُ موسمیاتی انصاف ءَ را دل یکیمی کنگ لوٹیت۔ بے نظیر انکم سپورٹ پروگرام ءَ را گیش موثر جوڑ کنگ بہ بیت تانکہ چاگرد ءِ جہلیں تبک ءَ را بااختیار جوڑ کنگ بہ بیت۔ راجی دیمروئی بے جنین ءِ دیمروئی ءَ ممکن نہ اِنت۔ ما وتی جنکاں ایمنی، ڈیجیٹل رسائی ءُ معاشی آجوئی ءِ آسراتی ءَ بہ دئیں۔ آئی ئَ گوشت کہ سیکورٹی، معیشت ئُُ آئین ئِ گورننس ئِ یکے دومی ئَ گوں وت بندوکیں ستون اَنت۔ مارا حاکمیت ءِ رکھینگ، ناشرکاری ءِ ھلاسی، اقتصادی دیمروئی، وفاقی ھمگرنچی ءُ جمہوری استحکام ءَ را وتی اولویت جوڑ کنگی اِنت۔ اللہ تعالیٰ مارا اے امانت ءِ پیلو کنگ ءَ سوبمند بہ کنت۔