بنجائی دارالحکومت اٹی فضائی کچٹی ن توننگ و ایئر کوالٹی انڈیکس اٹی گچینی کن سوگو و جوان ءُ حکمت عملی اس تینا کننگ آ زور

اسلام آباد۔ 02 مارچ (اے پی پی) بنجائی دارالحکومت اٹی فضائی کچٹی نا توننگ ایئر کوالٹی انڈیکس اٹی گچینی کن اسہ سوگو و جوان ءُ حکمت عملی اس تینا کننگ آ زور شاغانے ۔ کمامدار آتا رداٹ اسلام آباد اٹی ودوک آ فضائی کچٹی تون مون تننگ کن چندی بشخ آتیٹی عملی گام گیج آتے ترند کننگانے۔ سی ڈی اے نا کنڈ آن چاگڑد دوست ٹرانسپورٹ نا مون آ دننگ آ خاص چکار کننگ انگ اٹی ءِ ۔ دا رداٹ الیکٹرک وہیکل آتا است بڈی ، چارجنگ و انفراسٹرکچر نا ودفنگ وکاربن نا پیش تمنگ اٹی کمتی نا گام گیج آ تیاپیش رفت برجاءِ۔۔ حوالی نا رداٹ گاڑی تا اخراج نا باقاعدہ معائنہ و پوسکن مانیٹرنگ سسٹم نا خلنگ نا کمک اٹ مستند ایئر کوالٹی ڈیٹا نا دوئی کننگ ءِ ہم پک کننگ انگ ءِ ۔حوالی نا پاننگ ءِ کہ نیشنل کلین ایئر پالیسی نا رداٹ بنجائی دارالحکومت کن اسہ جوان و عمل نا قابل ایکشن پلان اس جوڑ کننگ آ امنا کننگانے ۔ دا ڈٹ اٹی ٹرانسپورٹ، صنعتی سرجزو، کچرہ غاتا خاخر تننگ  و کشار ی سوب آن ودی مروک آ کچٹی نا توننگ ءِ اولیت تننگک ۔ چاہندار آتا پاننگ ءِ کہ اگہ دا گام گیج آتیا گچین عملدرآمد  مس تو بروک آ سال تیٹی اسلام آباد نا ایئر کوالٹی انڈیکس اٹی نمان گچینی گمانی ءِ ، ہرانا نتیجہ ٹی شاری تا جان جوڑی و زندا ناآب آ مثبت اثرمرتب مریک۔ ایلو کنڈ آ پولن الرجی آن بچنگ نا بابت وزارتِ جان جوڑی نا بست وبند اٹی 3 آن 5 مارچ اسکان الرجی کیمپ اس اڈ تننگک۔ کیمپ اٹی شاری تے مفت طبی معائنہ، دوا و چاہندار ڈاکٹر آتتون سلاہ و سوج نا آسراتی ہم فراوان کننگک ۔