بلوچ کلچر ڈے ننے تینا تہذیبی قدر، روایتی لویس، بولی، سازوزیمل و مہمانداری کون آ بڑزکو روایت آتے تالان کننگ نا موقع اس فراوان کیک، صوبائی وزیر سردار عبدالرحمان کھیتران

کوئٹہ۔ 02 مارچ (اے پی پی ) صوبائی وزیر سردار عبدالرحمان کھیتران بلوچ کلچر ڈے انا وخت آ تینا بیان اٹی پارینے کہ بلوچ دودوربیدہ ننا پہچان، غیرت و روایت آتا تاریخ نا امین سرمایہ ءِ۔ بلوچ کلچر ڈے ننے تینا تہذیبی قدر، روایتی لویس، بولی، سازوزیمل و مہمانداری کون آ بڑزکو روایت آتے تالان کننگ نا موقع اس فراوان کیک۔ اوپارے کہ بلوچ مدام امن، بہادری و وفاداری نا درور جوڑ کرینے۔ اینو نادے نن دا عزم انا درشانی ءِ کینہ کہ تینا دودوربیدہ ئی میرات نا رکھ و مون آ دننگ کن ہرممکن گام گیج آتے برجاتخنہ۔ ورناچین ءِ تینا روایت آتون گنڈنگ وخت انا اہم ءُ گرج اسے تانکہ ننا دودوربیدہ بروک آ چین تیکن رکھوک منتقل  مننگ کے۔ صوبائی وزیر پارے کہ دودوربیدہ ئی ہم گرنچی قومی یکجہتی ءِ سوگو کیک و بلوچستان نا زیبائی اونا رنگ رنگی دودوربیدہ ئی تنوع ٹی اودیم ءِ ۔ حکومت بلو چستان دودوربیدہ ئی سرجزآتا مون آدننگ، فنکارآتا سرپرستی و تاریخی میرات آتا رکھ اکن عملی گام گیج کننگ اٹی ءِ۔ اوبلوچ کلچر ڈے انا وخت آ غٹ اہل بلوچستان ءِ مبارکبادی ترسا دااومیت نا درشانی ءِ کرے کہ نن غٹ اواری اٹ تینا تہذیب، بولی وروایت آتے زندہ و تابندہ تخنہ۔