حکومت ورنا تے واکدار کننگ و اوفتے جہانی منڈی نا خواست آتون ہم گرنچ کننگ کن بھلو گام گیج کننگ اٹی ءِ ، مشہود احمد خان

اسلام آباد۔ 02 مارچ (اے پی پی)چیئرمین وزیراعظم یوتھ پروگرام رانا مشہود احمد خان پارینے کہ حکومت ورنا تے واکدار کننگ و اوفتے جہانی منڈی نا خواست آتون ہم گرنچ کننگ کن بھلو گام گیج اس کننگ اٹی ءِ۔ اسلام آباد اٹی اسہ دود اسے آن تران کرسا او پارے کہ وزیراعظم شہباز شریف نا پارت آ غٹ تعلقدار ادارہ غاتے اسہ پلیٹ فارم اسے آ مچ کننگانے تانکہ باندات آتا جاچ ءِ ہلسا گچین حکمت عملی اس ترتیب تننگ مرے ۔ او پارے کہ اوورسیز منسٹری، بیورو آف امیگریشن و ایلو کمامدار آتتون سلابت آن پد ورنا تا تیکن آسراتی ودی کننگ انگ اٹی ءِ ۔رانا مشہود احمد خان پارے کہ حکومت ورنا تے بریبر نا موقع فراوان کننگ کن سنبرینگوک ءِ ۔ دا رداٹ لیپ ٹاپ اسکیم، اسکل ڈویلپمنٹ پروگرام و گوازی تا مون آ دننگ کون آ گام گیج آک برجاء ءُ تانکہ پاکستانی ورناک سائنس و ٹیکنالوجی تون اوار چندی بشخ آتیٹی جہانی کہول آ مقابلہ کننگ کیر۔ او پارے کہ پیشن نا ملک کاریم نا خواہندار ورنا تا تیکن دہ لکھ روپئی اسکان بے سود وام نا آسراتی درستی راستی کرفنگانے، ہرانا مسخت بنائی خڑچ و پیشن نا ملک اڈ کننگ نا بنائی تُوتیٹی مالی کمک فراوان کننگ ءِ ۔ او پارے کہ دا وام تے آسان قسط آتیٹی ولدا تننگ مریک و زر انا ترسیل ءِ کانودی و بینکاری ذریعہ اٹ پک کننگ آ ہم کاریم برجاءِ تانکہ زرِ مبادلہ رکھ انگا وڑ اٹ ملک آ برے۔چیئرمین وزیراعظم یوتھ پروگرام پارے کہ ڈیجیٹل و کیش لیس زرگزراننا مون آ دننگ کن خلیجی ملک خاص کر متحدہ عرب امارات تون اوار کاریم ءِ ودفنگ انگ ءِ ہراٹی پیشن نا ملک آہنوک آ پاکستانی تا تیکن ڈیجیٹل اکاؤنٹ ملنگ نا آسراتی فراوان کننگک ۔ او ورنا تیا زور شاغا کہ او پیشن نا ملک پاکستان نا سفیر نا حیثیت اٹ زموارانہ طرزِ عمل اس اختیار کیر ۔ او پارے کہ حکومت سافٹ اسکلز و اخلاقی تربیت آ خاص چکار کننگ اٹی ءِ تانکہ پاکستانی مخلوق جہانی کہول آ اسہ مثبت شناخت اس جوڑ کننگ کے۔ رانا مشہود احمد خان پارے کہ حکومت ورنا تا تیکن پوسکن وارخواہی ودی کننگ، اسکلڈ افرادی قوت تیارکننگ و زرگزرانءِ سوگو کننگ کن اسہ گچین ءُ ڈٹ اسے نا رداٹ گام گیج آتے برجاتخانے ۔