پاکستان ءَ سلامتی کونسل ءَ ھشدار داتگ کہ ایران ءِ سر ءَ اُرش ءُ بدلی ءِ کار دمگی ایمنی ءِ واستہ تاوان بار بنت

اقوام متحدہ – یکم مارچ (اے پی پی) : پاکستان ءَ اقوام متحدہ ءِ سلامتی کونسل ءَ را ھال داتگ کہ ایران ءِ سر ءَ امریکہ ءُ اسرائیل ءِ نیمگ ءَ اُرش ءُ ایشی ءَ پد سرجمیں دمگ ءِ سلامتی ھراب بیت ءُ ایشی ءِ آسر دور رس اَنت۔ اقوام متحدہ ءِ تہا پاکستان ءِ دائمی نمائندہ عاصم افتخار احمد ءَ سلامتی کونسل ءِ ہنگامی دیوان ءَ گوں تران کنان ءَ گوشت کہ ما دمگی جیڈھ ءِ ھترہ ءِ سر ءَ سک باز جیڑگ ءَ ایں ۔ اے دیوان فرانس، چین، روس، بحرین ءُ کولمبیا ءِ لوٹ ءِ سرا گوانک جنگ بوتگ۔ پاکستانی نمائندہ ءَ اے گپ ءِ سر ءَ اپسوز ءِ درشان کت کہ اے یکجائی اُرش ھما وھد ءَ بوتگ اَنت کہ ایمن ءُ گپ ءُ تران ءِ وسیلگ ءَ گیواری ءِ واستہ سفارتی کوشست برجاہ اِنت۔ آئی ءَ اے اُرش میان استمانی کانود ءِ ھلاپ ورزی لیک اِتگ اَنت۔ بلے آئی ءَ سعودی عرب، بحرین، اردن، کویت، قطر ءُ متحدہ عرب امارات ءِ سر ءَ ایران ءِ اُرش ھم مذمت کتگ ءُ اے ملکاں گوں یکوئی ءِ درشانی کتگ ءُ چہ آھاں لوٹ کتگ کہ آ گیش ءَ چہ گیش تحمل ءَ بہ کن اَنت۔ آئی ءَ عمان ءِ کرد ءَ را ساڑات کہ آ ایران ءُ امریکا ءِ نیام ءَ گپ ءُ تران ءِ آسراتی ءُ میانجی داری ءَ کنگ ءَ انت۔ آئی ءَ متحدہ عرب امارات ءَ اُرش ءِ وھد ءَ پاکستانی شہری ءِ بیرانی ءِ مذمت کتگ۔ پاکستانی نمائندہ ءَ درستیں فریق آنی سر ءَ زور پر دات کہ آ ترندی ءَ چہ کشیدگی ءَ را کم بہ کن اَنت ءُُ سفارتی راہ ءَ بہ رو اَنت ءُُ گیشیں گامگیج آنی تہ ءَ چہ رکگ بہ بنت کہ ایشی ءَ چہ دمگ ءِ ملک آنی ایمنی ءُُ سرزمین ءِ یکوئی ءَ را ھراب کنگ بوت کنت۔ گپ ءُ تران ءِ بندات ءَ اقوام متحدہ ءِ سیکرٹری جنرل انتونیو گوترز ءَ اقوام متحدہ ءِ منشور ءِ اصولانی حوالہ ءَ گشتگ کہ ہچ ریاست ءَ دگہ ریاست ءِ علاقائی یکوئی یا سیاسی حاکمیت ءِ ھلاپ ءَ زور ءِ کارمرز کنگ یا دھمکی دیگ مہ بیت۔ آئی ءَ ایران ءِ سر ءَ امریکہ ءُ اسرائیل ءِ اُرش ءُ ایشی ءَ پد بحرین، عراق، اردن، کویت، قطر، سعودی عرب ءُ متحدہ عرب امارات ءِ حاکمیت ءِ ایران ءِ ھلاپ ورزی ءِ مذمت کتگ۔ انتونیو گوترز ءَ ھشدار داتگ کہ ما میاں اوستمانی امن ءُ ایمنی ءِ ھاترا مزنیں ھترہ ءِ گندگ ءَ ایں ۔ سیکرٹری جنرل ءِ رد ءَ ایران ءِ تہران، اصفہان، قم، شہریار ءُ تبریز ءَ ھوار 20 ءِ کساس ءَ شہر نشانگ جوڑ کنگ بوتگ اَنت ءُ تہران ءِ صدارتی ماڑی ءِ نزیک ءَ مزنیں تراک ءِ ھال شنگ بوتگ۔ آئی ءَ اے گپ ءِ سر ءَ اپسوز کت کہ عمان ءِ دلالی ءَ امریکہ ءُُ ایران ءِ نیام ءَ بالواسطہ گپ ءُُ تران ءِ سیمی راؤنڈ ءَ پد سفارتکاری ءِ موہ گار بوتگ۔ آئی ءَ زوتیں جنگ بندی، ڈی اسکالیشن ءُ مذاکرات ءِ میز ءِ سر ءَ واتر بوھگ ءِ لوٹ کتگ ءُ ھاسیں رنگ ءَ ایران ءِ جوہری پروگرام ءِ سر ءَ۔ پاکستان ءَ یک رندے پدا گوشت کہ دمگ ءِ پیسر ءَ چہ نا شریں جاور ھال آنی رد ءَ جیڈھ آناں پرامن گیواری، گپ ءُُ تران ءُُ سفارتکاری دیمروئی ءِ یکیں راہ اِنت۔