اسلام آباد۔26فروری (اے پی پی): وفاقی وزیر سرمایہ کاری بورڈ قیصر احمد شیخ ءَ پنچ شمبے ءِ روچ ءَ کوکا کولا آئس چیک پاکستان ءِ مزن تک ءِ ڈل ءَ گوں گند ءُ نند کت۔ ڈل ءِ تہ ءَ سرکان سلجوق (چیف فنانشل آفیسر)، سید عمر (ڈائریکٹر کارپوریٹ افیئرز ءُ  مھکمی) ءُ عمر ایوب خان (گورنمنٹ ریلیشنز لیڈ)  ھوار اتنت۔ ڈل ءَ مزن وزیر شہباز شریف ءُ وفاقی وزیر قیصر احمد شیخ ءِ سروکی ءَ حکومت ءِ سرمایہ کار دوستیں پالیشی ءُ ملک ءِ معیشت ءِ برجائی ءِ واستہ چست کتگیں موثر گامگیج آناں ساڑات۔ ایشاں سرمایہ کاری ءِ بورڈ ءِ فعال ءُ آسراتی ءِ کرد ءَ را ھم خراج تحسین پیش کت۔ گند ءُ نند ءِ ساھت ءَ کمپنی ءَ وتی کاروباری کرد ءُ میاں اوستمانی ھست بوھگ ءِ بابت ءَ سرجمیں بریفنگ داتگ ءُ سرپدی داتگ کہ آ پاکستان ءَ کوکا کولا ءِ باقاعدہ بوٹلنگ پارٹنر اِنت ءُ مشروبات ءِ شوبگ ءَ مزنیں مارکیٹ ءِ بھر ءُ بانگ ءِ واھند اِنت۔ کمپنی ءَ ھال داتگ کہ آئی ءَ پاکستان ءَ نزیک ءَ یک ارب ڈالر ءِ سرمایہ کاری کتگ ءُ آیوکیں وھد ءَ گیش سرمایہ کاری کنگ، پیداواری گنجائش ءَ را گیش کنگ ءُ نوکیں رنگ ءِ چیز آناں دیم ءَ آرگ ءِ منصوبگ انت۔ ڈل ءَ اے گپ ءِ سر ءَ زور پر دات کہ کمپنی ٹیکس ءِ کانود، انسانی ھک، برابری ءِ اجرت ءُ کارمند آنی وشھالی ءِ ھوالگ ءَ سرجمیں رھبند آنی سر ءَ سرجمی ءَ عمل کنت۔ کاربونیٹڈ مشروبات ءِ سر ءَ وفاقی ایکسائز ڈیوٹی ءِ سر ءَ ھم گپ ءُ تران کنگ بوت۔ ڈل ءَ ھال دات کہ اے جیڈھ ءِ سر ءَ وزارت ءِ ھزانگ ءُ فیڈرل بورڈ آف ریونیو ءَ ھوار سیادی داروکیں ادارگ آنی گوما پیسر ءَ چہ شور ءُ سلاھ ءِ عمل ءَ اِنت تانکہ صنعت ءِ برجمیں دیمروئی ءُ مقابلہ ءِ توان ءَ را دل یکیمی کنگ بہ بیت۔ وفاقی وزیر قیصر احمد شیخ ءَ پاکستان ءَ کمپنی ءِ دراجیں مدتی سرمایہ کاری، روزگار ءِ موہ ءُ ذمہ واریں کاروباری رھبند آنی پجارینگ ءِ توسیپ کت ءُ دل یکیمی دات کہ حکومت دمگی ءُ درملکی سرمایہ کار آناں ھرچ وڑیں آسراتی ءِ پھجارینگ ءَ برجاہ دار ایت۔ بورڈ آف انویسٹمنٹ پاکستان ءَ پائیدار سرمایہ کاری ءَ را دیمروئی دیگ ءُ جوانیں کاروباری ماحول ءِ پجارینگ ءِ واستہ جزم انت۔