ناجائزیں امیگریشن ءِ ھلاپ ءَ پاکستان ءِ مزنیں سفارتی سوبمندی، وفاقی وزیر داخلہ محسن نقوی ءَ یورپ ءِ 3 ملک آنی تہی کارانی وزیر آنی گوما گند ءُ نند کتگ، کانفرنس ءَ بھر زرتگ

روم۔26فروری (اے پی پی): پاکستان ءُ یورپ ءِ ملک آنی نیام ءَ غیر کانودی امیگریشن ءِ گر ءُ دار ءِ واستہ ھاسیں پیشرفت بوتگ۔ وفاقی وزیر داخلہ محسن نقوی ءَ روم ءَ اٹلی ءُ اسپین ءِ داخلہ ءِ وزیر ءُ یونان ءِ ہجرت ءِ وزیر ءِ ہمراہی ءَ 4 ملکی ھاسیں کانفرنس ءَ بہر زرتگ ات کہ ایشی ءِ تہا انسانی سوداگری ءُ غیر قانونی ہجرت ءِ ہلاس کنگ ءِ ھاتر ءَ دور رسیں پیسلہ کنگ بوتگ ات۔ وزارت داخلہ ءِ جارکش ءِ رد ءَ اٹلی، اسپین ءُ یونان ءَ ناجائزیں امیگریشن ءَ را 47درسد کم کنگ ءِ واستہ پاکستان ءِ کوشست آناں مزنیں شرپ ءُ شان داتگ۔ وزیر داخلہ محسن نقوی ءِ تجویز ءِ سر ءَ یورپی سئیں ملک آنی تہ ءَ اے گپ ءِ سر ءَ تپاک کنگ بوتگ کہ ناجائزیں راہ آنی بدل ءَ قانونی کارروائی آناں دیمروئی دیگ ءَ انسانی سوداگری ءِ سر ءَ گر ءُ دار کنگ بیت۔ چاریں ملک آنی تہ ءَ ناجائزیں مہاجرت، انسانی سوداگری ءُ منشیات ءِ ھلاپ ءَ یک ھمگرنچیں رھبند ءُ یکجائی پالیسی ءِ چارچوب ءِ زورگ ءِ سر ءَ تپاک کنگ بوتگ۔ دیوان ءَ پیسلہ کنگ بوت کہ گرانیں جرماں ھواریں مجرم یورپ ءَ چہ واتر پاکستان ءَ آرگ بنت اودا آھانی ھلاپ ءَ کانود ءِ رد ءَ سکیں سکیں کارروائی کنگ بیت۔

اٹلی ءِ تہی کارانی وزیر میٹیو پینٹے دوس ءُ اسپین ءِ تہی کارانی وزیر فرنانڈو گرانڈے مارلاسکا ءَ محسن نقوی ءِ سروکی ءَ پاکستانی ادارگ آنی مثالی کاروائی آناں ساڑات ءُ گوشت کہ پاکستان ءَ اے چیلنج ءَ گوں گر ءُ چیل بوھگ ءِ واستہ جوانیں گامگیج چست کتگ۔ ایشاں یورپی یونین ءِ وسیلگ ءَ پاکستان ءِ صلاحیت جوڑ کنگ ءِ واستہ سرجمیں کمک ءِ دل یکیمی ھم دات۔ تہی کارانی وزیر محسن نقوی ءَ گوشت کہ یورپ ءَ را غیر کانودی امیگریشن ءَ چہ گیش تاوان رستگ۔ اے چیلنج ءَ را ایوک ءَ یک مشترکہ ءُ موثر طریقہ کار ءِ وسیلگ ءَ ھلاس کنگ بیت۔ ما مافیا ءَ را قانون ءِ چیر دستی ءَ آرگ ءِ ھاتر ءَ سکیں گامگیج چست کتگ۔ کانفرنس ءِ تہا پیسلہ کنگ بوت کہ چاریں ملکانی دیم ءِ دیوان ھمے سال ءَ پاکستان ءَ بیت۔ ریپڈ رسپانس سسٹم ءَ را گیش موثر جوڑ کنگ بیت۔ دو نیمگی کمک ءُ ہمگرنچی ءَ را چہ جہل ءِ تک ءَ تاں گہتر کنگ بیت۔ اے ھاسیں گند ءُ نند ءَ پاکستان ءِ سفیر علی جاوید، ڈی جی ایف آئی اے ڈاکٹر عثمان انور ءُ اے دگہ مزنیں کارندہ ھم ساڑی ات انت۔