بلوچستان یوتھ ریسورس سینٹر اٹی انٹرپرینیورشپ ہیلکاری سیشن، 20 آن زیات خوانوک آ مسن تا شرکت

کوئٹہ 26 فروری (اے پی پی) بلوچستان اٹی ورنا خاص کر خوانوک آ مسن تے واکدار کننگ و اوفتے جند انا روزگار نا قابل جوڑ کننگ کن اسہ اہم ءُ ہیلکاری سیشن اس ہرانا سرحال "انٹرپرینیورشپ” ئس،اڈ تننگا۔ دا سیشن اٹی 20 آن زیات خوانوک آ مسنک پبی بشخ ہلکر۔ ترجمان محکمہ امورِ نوجوانان نا رد اٹ ، پروگرام نا ٹرینر محمد نوید خان بشخ ہلوک آتے کاروبار بناء کننگ نا بنداوی اصول، مارکیٹ ریسرچ، بزنس پلاننگ و ڈیجیٹل مارکیٹنگ نا بارو اٹی سرجم وڑ اٹ معلومداری تس۔ہیلکاری سیشن نا وخت آ خوانوک آ مسنک نئے بیرہ است خواہی نا درشانی ءِ کریر بلکہ چندی کاروباری آئیڈیاز ہم پیش کریر، ہرافتے ٹی آن لائن بزنس، دستکاری (دو انا کاریم)، فوڈ سروس و ہندی گڑاتا برانڈنگ اوار ئسر۔ٹرینر نا کنڈ آن عملی کاریم و گروپ ورک انا کمک اٹ طالبات آتا راہشونی ءِ کننگا تانکہ او تینا سوج آتے کاریم اٹ اتوک آ ڈٹ آتیٹی  بدل کننگ کیر۔طالبہ غاک دا وخت آ تینا خیال آتا درشانی ءِ کرسا پاریر کہ تعلیم تون اوار اوار کاروباری لائخی تے مون آ ہتنگ نا دا کوشست سفت نا قابل ءِ۔ او دا گام گیج آ وزیراعلیٰ بلوچستان نا منت واری ءِ ہرفیر و دادے تینا روشن آخبت نا کنڈ آ اسہ اہم ءُ گام اس گوندار۔