عام شاری تا خون ءِ وخت اس ہم روا گوندنگ مفک ، بنجائی وزیر پارلیمانی امور ڈاکٹر طارق فضل چوہدری نا بھارتی وزیراعظم نا بیان آ ردِعمل

اسلام آباد ۔ 26 فروری (اے پی پی) بنجائی وزیر پارلیمانی امور ڈاکٹر طارق فضل چوہدری پارینے کہ لس شاری تا خون ءِ وخت اس ہم روا گوندنگ مفک۔ غزہ ٹی بے پناہ شاری مصیبت آتا سوب مروک آ کارروائی تا گواچی ءُ، و اوفتے کن بدل مفروک صف بندی نا رداٹ نریندر مودی نا ریمارکس آک خورک ءُ ۔اسرائیلی پارلیمنٹ کنیسٹ آن تران آن مست بھارتی وزیراعظم نریندر مودی نا ریمارکس آ راجی رابطہ نا ویب سائٹ ایکس آ تینا اسہ بیان اسے ٹی او پارےغزہ نا ایلو کنڈ، مچ آ محلہ غاک کپی جوڑ مسنو، خور انا کمتی بھسکار کہول اسکان سرمسنے ، طبی آسراتی بمشکل کاریم کننگ ءُ، و وار وار نا جنگ و جھیڑہ غاک امن نا دیرپا اُمیت آتے پرغانو۔ انسانی حق و شاری رکھ انا اصول بیرہ انتخابی نعرہ مننگ کپک ، سیاست آن ایڑتر اونا اسہ وڑ بایدے اطلاق مرے ۔او پارے کہ جہانی سرکڑدہ اخلاقی مستقل مزاجی نا خواست کیک۔ ہراتم زرگزرانی  یا تزویراتی فائدہ غاک انسانی خدشات آتے زیر کیرہ ، تو لامحالہ ساکھ آ سوج انا نشان لگک ۔ امن کن سچائی نا وابستگی نا خواست ءِ کہ ناانصافی ہراڑے کہ مرے اونا برخلاف توار چست کننگے۔ دا وخت دنیا نا مچ آ قوم تیان غور و فکر نا خواست کیک۔ سفارتی و واپاری تعلقداری ءِ وخت اس ہم انسانی قدر آتا نہا د آبایدے بف۔ دنیا ءِ فیصلہ کروئی مریک کہ او گونڈ مدی فائدہ غاتے اولیت ایتک یا جہانی انصاف و انسانی وقار (شرف) تون سوگوی اٹ سلوک مریک۔