این ڈی ایم اے نا نیشنل ایمرجنسیز آپریشن سینٹر نا کنڈ آن مارچ و ستمبر اٹی گلیشیائی جھیل آتا ترخنگ آن نوکاپ نا خطرہ غاتا بارواٹی ایڈوائزری جاری کرے

اسلام آباد ۔ 26 فروری (اے پی پی) نیشنل ڈیزاسٹر مینجمنٹ اتھارٹی (NDMA) نا نیشنل ایمرجنسیز آپریشن سینٹر (NEOC) مارچ آن ستمبر 2026 اٹی ودوک آ درجہ حرارت نا سوب آن گلیشیائی جھیل آتا ترخنگ آن نوکاپ (گلاف) نا خطرہ غاتا بارو اٹی ایڈوائزری جاری کرے۔ترجمان این ڈی ایم اے نا رد اٹ موسمیاتی پیٹرن اٹی بدلی و قطبی علاقہ غاتیٹی گمانی بنائی ہیٹ ویونا سوب آن مارچ آن جون اسکا ن درجہ حرارت اٹی بے کچ ودکی گمانی ءِ، ہراڑان برف و گلیشیئرآک ترندی اٹ دِیر مننگ کیرہ۔ دا حالیت آتا سوب آن گلیشیائی جھیل آتا ترخنگ نا واقعہ رونما مننگ کیک ہرا شیفکو علاقہ غاتیٹی اناگت نوکاپ نا سوب جوڑ مرسا آبادی، اُرا، کشاری ڈغار، بنداوی پنجر و مواصلاتی نظام ءِ نسخان تننگ کیک ۔ وخت اس کہ انسانی جان تے ہم خطرہ مریک۔این ڈی ایم اے ہشیار کرینے کہ گلگت بلتستان نا احمد آباد، فیض آباد، مجاور، وادی اشکومن، گلکن، گلمت، بوبر و ہندس تون اوار کیہی علاقہ غاک گمانی وڑاٹ زہمی مننگ کیرہ ۔ ہنداوڑ خیبر پختونخوا نا ریشون، کمراٹ، یارخن ویلی، لشٹ، استاچ، ڈزق و بریپ اٹی ہم گلیشیائی جھیل آتا سوب آن نوکاپی حالیت آتا گڑتی ءِ۔ترجمان نا رد اٹ، گلگت بلتستان و بڑزکو خیبر پختونخوا ٹی گلیشیائی جھیل آتا ہروخت چاری مننگ ءِ و غٹ تعلقدار ادارہ غاتے پیشگی حوال تننگانے۔ پی ڈی ایم اے (PDMA)، جی بی ڈی ایم اے (GBDMA)، ضلعی انتظامیہ و ریسکیو 1122 ءِ پارت تننگانے کہ او ہلہلہ ئی وڑ اٹ مخلوق نا کشنگ نا ڈٹ آتا اول سرآن جاچ ءِ ہلیر ، پیشگی حوال تننگ نا نظامءِ فعال تخر و ہر وڑ نا حالیت آتون مون تننگ کن تینا تیاری تے پورو کیر۔این ڈی ایم اے الس آن خواست کرینے کہ او موسم نا بارو اٹی متبر معلومداری ذرائع تیا نظر تخر ، دریا و گلیشیائی ندی تا خڑک آن مر مریر و ہروڑنا ہلہلہ ئی حالیت آتیٹی ہند ی انتظامیہ نا پارت آتیا دمدستی عمل کیر ۔ وخت آ معلومداری و الرٹس کن “Pak NDMA Disaster Alert” موبائل ایپ و سرکاری پلیٹ فارمز آن کمک ہلیر۔