پاکستان ناشونداری وسیلہ یا خواری نا کمتی آن سلتنے ، ادارہ جاتی لائخی و گورننس نا سوگو مسٹ میکو درجہ نا ساڑی مفننگ دانا بھلا سوب ءِ، احسن اقبال

اسلام آباد۔ 26 فروری (اے پی پی)بنجائی وزیر ڈٹ بندی ، شونداری و خصوصی گام گیج پروفیسر احسن اقبال پارینے کہ پاکستان نا شونداری وسیلہ یا خواری نا کمتی  آن سلتنے بلکن ادارہ جاتی لائخی و و گورننس نا سوگو مسٹ میکو درجہ نا ساڑی مفننگ دانا بھلا سوب ءِ ۔پنچ شنبے نا دے پاکستان گورننس فورم 2026آن تران کرسا او پارے کہ 24 کروڑ نا آبادی والا ملک ءِ بیرہ 1,200 سرکاری دفتر آتا کمک اٹ جوان وڑ اٹ چلیفنگ مفک ۔ جمہوریت ءِ حقی وڑ اٹ کٹیائی جوڑ کننگ کن دانا دنگ ءِ شیفکو کہول اسکان ودفوئی مریک ، ہراڑے کم آن کم اِرا لکھ ہندی نمائندہ غاک الس نا خدمت اٹی تینا کاریمی کڑد ءِ ادا کیر۔او پارے کہ ہرا وخت اسکان شیفکو کہولءِ واکدار جوڑ کننگپک و موسمیاتی مزاحمت (کلائمیٹ ریزیلینس) ءِ زرگزران نا بنداوی پنجر نا بشخ جوڑ کننگپک، ہمو وخت اسکان گورننس نا پہیلی پورو مننگ کپک۔وزیر ڈٹ بندی پارے کہ پاکستان گورننس فورم 2026 اسہ بھلو و باوقار ءُ دیوان اس ئس، ہراٹی بنجائی و صوبائی حکومت آتا بڑزکو سرکڑدہ ، جہانی شونداری شریداری ، سرحالی چاہندارآک ، جامعہ غاک، تھنک ٹینکس و پامدار آ مخلوق آک بشخ ہلکر۔ دا پلیٹ فارم تینا جاچ ءِ ہلنگ نا اسہ جوان ءُ موقع اس فراہم کیک تانکہ دا ہیت نا جاچ ءِ ہلنگ مرے کہ قومی شونداری ءِ پوسکن آ جِلا تننگ کن گورننس نا پنجراٹی ہرا اصلاحات آتا گرج ءِ ۔