وزیراعظم محمد شہباز شریف نا فتنہ الخوارج نا برخلاف آپریشن اٹی شہید مروک آ لیفٹیننٹ کرنل شہزادہ گل فراز نا اُرا غا ہننگ، خاہوت تون ہمدردی نا درشان

اسلام آباد۔ 26 فروری (اے پی پی)وزیراعظم محمد شہباز شریف فتنہ الخوارج نا برخلاف آپریشن اٹی سکیورٹی فورس آتا کماشی ءِ کرسا جامِ شہادت نوش کروک آ لیفٹیننٹ کرنل شہزادہ گل فراز شہید نا اُرا مانسہرہ غا ہنا و اونا خاہوت تون ہڑزخواہی نا درشانی ءِ کرے۔پنچ شنبے نا دے آپی ایم آفس نا میڈیا ونگ آن جاری مروک آ بیان نا رداٹ، وزیراعظم محمد شہباز شریف دا وخت آ لیفٹیننٹ کرنل شہزادہ گل فراز شہید نا لمّہ، اُرائی  و چنا تتون اوار ایلو رشتہ دارآتون اوڑدہی کرے ۔ وزیراعظم لیفٹیننٹ کرنل شہزادہ گل فراز شہید نا قبر آ ہم ہنا و دعاپاتیاکرے۔وزیراعظم لیفٹیننٹ کرنل شہزادہ گل فراز شہید نا درجہ غاتا بڑزی و اونا خاہوت کن صبرِ جمیل نا دعاکرے۔ وزیراعظم پارے کہ لیفٹیننٹ کرنل شہزادہ گل فراز شہید وطنِ عزیز نا رکھ انا خاطر تینا جان ءِ ندر  کرے۔ او ہمت و بہادری نا اسہ بھلو درور اس جوڑ کرے۔ کنتون اوار مچ آ قوم ءِ تینا شہید  و اوفتا خاہوت آ گمر ءِ۔ او پارے کہ پاکستانی قوم تینا شہید و اوفتا خاہوت نا قربانی تے اسُل است آن دپک ۔ شہید نا خاہوت نا حکومت و پاک فوج پورو وڑ اٹ خیال ءِ تخرہ ۔ دا وخت آ وزیراعظم محمد شہباز شریف مانسہرہ ٹی  لیفٹیننٹ کرنل شہزادہ گل فراز شہید نا پن اٹ اسہ "دانش سکول” اس جوڑ کننگ نا ہم پڑو کرے۔بنجائی وزیر آک عطاء اللہ تارڑ، انجینئر امیر مقام، سردار محمد یوسف، وزیراعظم نا سلاہکار رانا ثناء اللہ، کیپٹن (ر) محمد صفدر، مرتضیٰ جاوید عباسی و شاہ جی گل آفریدی ئسک ہم وزیراعظم تون اوار ئسر۔