پاکستان گورننس فورم نا جوڑ کننگ شفافیت ءِ پک کننگ کن مزل نا نشان مریک ، اسپیکر قومی اسمبلی سردار ایاز صادق نا ’’پاکستان گورننس فورم‘‘ آن تران و میڈیا تون گپ وتران

اسلام آباد۔ 26 فروری (اے پی پی)سپیکر قومی اسمبلی سردار ایاز صادق پارینے کہ پاکستان گورننس فورم نا جوڑ کننگ شفافیتءِ پک کننگ کن مزل نا نشان جوڑ مریک۔ جوابدہی نا عمل کن گچین گورننس بے کچ اہمیت تخک۔ گورننس نا بناء مدام تینا اُرا آن مریک، ہندا سوب آن قومی اسمبلی سیکرٹریٹ اٹی سنیارٹی، فٹنس و ٹیسٹ نا نظام ءِ پین گچین کننگانے۔دا خیال آتا درشانی ءِ او پنچ شنبے نا دے داڑے وزارتِ ڈٹ بندی و شونداری نا کنڈ آن’’پاکستان گورننس فورم‘‘ آن تران کرسا کرے ہراٹی او میڈیا تون ہم ہیت و گپ کرے۔او پارے کہ پوسکن انفارمیشن ٹیکنالوجی نا بدل مروک آ دور اٹی گورننس ءِ جوان کننگ و شفافیت اتنگ کن ’’پاکستان گورننس فورم‘‘ نا جوڑ کننگ بے کچ اہمیت تخک۔ ہر ملک انا شونداری کن سیاسی سوگوی و اواری اٹ کوشست آتا گرج مریک، ہندا سوب آن دا ادارہ پاکستان نا شونداری و خوشحالی کن اسہ مزل نا نشان اس جوڑ مریک۔او پارے کہ شفافیت ءِ پک کننگ کن جوابدہی نا عمل بھازالمی ءِ ۔ نن قومی اسمبلی سیکرٹریٹ اٹی جوان انگا گورننس کن چندی اصلاحات کرینن، انتئے کہ گورننس نا بناء مدام تینا اُرا آن مریک۔ نن شفافیت کن سنیارٹی، فٹنس و ٹیسٹ ءِ بنداوی حیثیت تسونن۔ جمہوری نظام اٹی پارلیمنٹ بنداوی اہمیت تخک۔ پارلیمنٹ نا پبلک اکاؤنٹس کمیٹی احتساب نا غٹ آن اہم آ فورم ءِ ۔سردار ایاز صادق پارے کہ قومی اسمبلی نا فنانس کمیٹی ٹی حکومت و اپوزیشن نا باسک آتا نمائندگی مریک۔ دا کمیٹی ءِ واکدار جوڑ کننگ و فیصلہ سازی ءِ ادارہ جاتی حیثیت تننگ کن سپیکر نا واکداری تے گدریفنگانے  ۔ اوکان پد میڈیا نا نمائندہ غاتون ہیت و گپ کرسا سردار ایاز صادق پارے کہ گورننس نا بابت قانون سازی مننگ اٹی ءِ ۔ شفافیت و جوان گورننس کن غٹ ءِ اواری اٹ کاریم کروئی مریک۔ پاکستان گورننس فورم جوان انگا گورننس کن اسہ مزل اسے نا نشان جوڑ مریک۔