افغانستان نا ڈغار آن پاکستان نا برخلاف برجا دہشت گردی داسہ اودیمءُ  ہیت اس سلتنے، ڈاکٹر طارق فضل چوہدری

اسلام آباد۔  26 فروری(اے پی پی) بنجائی وزیر پارلیمانی امور ڈاکٹر طارق فضل چوہدری پارے کہ افغانستان نا ڈغار آن پاکستان نا برخلاف برجا دہشت گردی اسہ اودیم ہیت اس سلتنے۔ کرک اٹی فرنٹیئر کانسٹیبلری نا قافلہ غا بزدلانہ جلہو ، شکردرہ (کوہاٹ) اٹی ڈی ایس پی اسد محمود تون اوار کارندہ غاتا شہیدی و بھکر اٹی خودکش دھماکہ دا غٹ واقعہ غاک دا ہیت انا شاہدی ءُ کہ ریاستِ پاکستان ءِ اسہ منظم ءُ سازش اسے نا رداٹ شست کننگ انگ ءِ ۔پنچ شنبے نادے آ راج رابطہ نا ویب سائٹ ’’ایکس‘‘ آ تینا اسہ بیان اسے ٹی اوپارے کہ روچہ مبارک کون آ مقدس تُو اٹی کودک جان تا دتر ءِ وہیفنگ دا ہیت نا دلیل ءِ کہ دا دہشت گرد آتا نئے اسلام تون تعلقداری اس ارے و نئے پختون روایات آتون۔ دا زموارآک تینا خودساختہ نظریہ غاتا پوروی کن انسانیت نا ہر حد ءِ پار کننگ کن تیارءُ۔ اوپارے کہ پاکستان نا کنڈ آن وار وار خواست کننگا کہ اوغان ڈغار ءِ فتنہ الخوارج و ایلو دہشت گرد ٹولی تیکن کاریم اٹ اتنگ کن اِلنگپ ولے داڑان چپ پاکستان نا برخلاف زوراکیو دراندازی ننا وتواجہی ءِ چیلنج کننگ نا آنبار ءِ ۔ریاستِ پاکستان دا ہیت ءِ پیدوار کننگ خواہک کہ قومی سلامتی، وقار و الس نا جان و مال نا رکھ ہر سیاسی وابستگی و فائدہ غاتیان بالاتر ءِ۔ دا جنگ انا ورندی ءِ پورو قومی اتحاد، السی مخ رتفی و سوگو عزم اٹ تننگک۔ننا سکیورٹی فورسز و قانون نافذ کروک آ ادارہ غاک قوم نا پورو تائید اٹ دہشت گردی نا ناسور ءِ بن و بنداو آن کشنگ کن سنبرینگوک ءُ۔اینو وخت انا خواست ءِ کہ نن سیاسی اختلاف آتیان ایڑترمرسا دشمن نا گندہ غا عزم آتا مقابلہ ءِ کین۔ پاکستان نا برخلاف مروک آ دا دہشت گردی ءِ ہچ ءُ وڑ اسے ٹی سگنگپک۔ پاکستان نا امن، وتواجہی و سالمیت آ ہچ ءُ سمجھوتہ اس مفک ۔ قوم یکجاءِ ، فوج مستعد ءِ وہر قربانی نا حساب ءِ ہلنگک۔