وزیرِ دفاع خواجہ آصف نا خصوصی کمکار ہارون اختر خان تون اوڑدہی، زرگزرانی شونداری و بروک آ بنجائی بجٹ نا بابت امور آتیا گپ وتران

اسلام آباد۔ 25 فروری (اے پی پی)وزیرِ دفاع خواجہ محمد آصف وزیرِ اعظم نا خصوصی کمکار صنعت و پیداوار ہارون اختر خان تون اوڑدہی کرے ہراٹی پاکستان نا زرگزرانی شونداری، برآمدات  آتا مون آ دننگ و بروک آ بنجائی بجٹ  نا با بت امور آ گپ وتران کننگا۔وزارتِ صنعت و پیداوار نا کنڈ آن جاری مروک آ بیان نا رداٹ، دا اوڑدہی ٹی سیالکوٹ چیمبر آف کامرس اینڈ انڈسٹری نا اسہ ڈل  اس ہم بشخ ہلک و بروک آ بجٹ کن تینا سلاہ و سفارشات آتے پیش کرے۔اوڑدہی نا وخت آ ہارون اختر خان پارے کہ بروک آ بجٹ صنعت دوست و کاروبار دوست مریک، ہرا نا مسخت کاروباری برادری ءِ ریلیف و آسودہی فراوان کننگ ءِ ۔ او پارے کہ خراج  آتیٹی نرمی وآسودہی تا بابت سلاہ غاک زیرِ غور ءُ و حکومت عملی و شونداری آ تالان گام گیج آتے بجٹ نا بشخ جوڑ کننگ کن سنبرینگوک ءِ ۔او دا ہیت آ زور شاغا کہ پاکستان نا زرگزرانی شونداری حکومت نا اولیت ءِ ۔ وزیرِ اعظم شہباز شریف نا پارت آتا رداٹ غٹ وزارت آک برآمدات آتیٹی ودکی و قومی زرگزران ءِ سوگو کننگ کن دے و نن کاریم کننگ اٹی ءُ۔ہارون اختر خان پین پارے کہ وزیرِ اعظم نا وژن نا رداٹ پاکستان نا تاریخ اٹی اولیکو وار قومی صنعتی پالیسی تیار کننگانے، ہرا پائیدار صنعتی شونداری کن اسہ جوان ءُ فریم ورک اس فراوان کیک۔