سپیکر قومی اسمبلی نا کوہاٹ اٹی پولیس موبائل آ فتنہ الخوارج نا دہشت گرد آتا جلہو نا مذمت

اسلام آباد۔ 25 فروری (اے پی پی)سپیکر قومی اسمبلی سردار ایاز صادق کوہاٹ نا شکردرہ روڈ آ پولیس موبائل آ فتنہ الخوارج نا دہشت گرد آتا جلہو نا مذمت ءِ کرساجلہو اٹی ڈی ایس پی اسد محمود خان تون اوار ہفت بندغ آتا جانی نسخان آ ارمان و است ہسونی نا درشانی ءِ کرے۔چار شنبے  نا دے آ تینا مذمتی بیان اٹی او شہید ڈی ایس پی اسد محمود خان، سب انسپکٹر انار گل، ہیڈ کانسٹیبل وہاب علی، کانسٹیبل مدثر و کانسٹیبل سید عامر عباس ءِ خراجِ عقیدت پیش کرے و شہید آتا خاہوت آتیکن ہمدردی و ہڑزخواہی نا درشانی ءِ کرے۔ او پارے کہ مچ آ قوم شہید آتا خاہوت آتا غم و ڈکھیائی ٹی بریبر نا شریک ءُ۔دہشت گرد آتا مقابلہ ءِ کرسا جان تے ندر کروک آ شہید آک ننا پیشانی نا ٹک آک ءُ، پولیس موبائل ءِ شست کننگ اسہ پاش ءُ دہشت گردی و لغور ءُ  کارروائی اسے۔ دہشت گرد آتا اسلام، پاکستان و انسانیت تون ہچ ءُ تعلق اس اف، ننا مذہب ہچ ءُ بے گناہ بندغ اسے نا خون ءِ کننگ نا موکل تفک۔سپیکر قومی اسمبلی دہشت گردی نا جلہو اٹی ٹھپی مروک آ پولیس کارندہ غاتا زوت جان جوڑی کن دعا کرے۔ او پارے کہ مچ آ قوم تینا بہادر پولیس کارندہ غاتا قربانی تے سلام پیش کیک۔ ننا شہید آتا خون اسُل زیان مفک ۔ دہشت گردی نا ناسور نا برخلاف مچ آ قوم و کانود نافذ کروک آ ادارہ غاتا عزم پکا ءِ۔ ملک اٹی امن و ایمنی نا قیام اسکان دہشت گرد آتا برخلاف کارروائی برجاسلک ۔ سپیکر قومی اسمبلی شہید آتا درجہ غاتا بڑزی و غمزدہ خاہوت آتا کن صبرِ جمیل نا دعا ہم کرے۔