چیئرمین سینیٹ سید یوسف رضا گیلانی نا لاچی ٹی پولیس وین آ جلہو و سویلی وزیرستان اٹی سکول ءِ بارودی مواد اٹ بِٹنگ نا است ہسون واقعہ نا مذمت

اسلام آباد۔ 25 فروری (اے پی پی)چیئرمین سینیٹ سید یوسف رضا گیلانی کوہاٹ نا علاقہ لاچی ٹی پولیس وین آ مروک آ لغور دہشت گرد جلہو و سویلی وزیرستان اٹی اسہ سکول اسے  بارودی مواد اٹ بِٹنگ  نا است ہسون واقعہ نا سخت انگا لوز آتیٹی مذمت ءِ کرے۔چیئرمین سینیٹ کوہاٹ اٹی مروک آ جلہو نا رداٹ ڈی ایس پی لاچی اسد محمود، پولیس کارندہ غاک و اسہ شاری اسے  نا شہیدی آ ارمان و است ہسونی نا درشانی ءِ کرے۔ او شہید مروک آ بندغ آتیکن درجہ غاتا بڑزی اوفتاخاہوت آتیکن صبرِ وجمیل نا دعا کرسا پارے کہ مچ آ قوم دا است ہسون سانحہ غا غمزدہ ءِ و زہمی خاہوت آتا ڈکھیائی ٹی بریبر نا شریک ءِ ۔سینیٹ سیکرٹریٹ آن جاری مروک آ ہڑزخواہی بیان اٹی چیئرمین سینیٹ پارے کہ دہشت گردی نا برخلاف جنگ اٹی ننا پولیس و سکیورٹی فورس آتاقربانیک ناقابل فراموش ءُ۔ ڈی ایس پی اسد محمود و ایلو کارندہ غاک وطنِ عزیز کن تینا جان تے ندر کرسا  بہادری و فرض شناسی نا اسہ بڑزکو درور  اس جوڑ کریر، مچ آ قوم تینا دا بہادر گلزادہ غاتے سلام پیش کیک۔چیئرمین سینیٹ دا ہیت آ زور شاغا کہ دہشت گرد آتا دا لغور انگا  کارروائیک قوم ا نا حوصلہ غاتے شیف شاغنگ کپسہ ۔ او پارے کہ دہشت گردی نا پورو چٹفنگ  اسکان دا جہد مچ آ واک و یکجہتی اتون برجاسلک و ریاست ہر کہول آ دا ناسور نا برخلاف گچین گام گیج آتے برجاتخک ۔سویلی وزیرستان اٹی تعلیمی ادارہ غا جلہو کننگ نا واقعہ غا سخت گڑتی نا درشانی ءِ کرسا او پارے کہ تعلیم دشمن زموار آک ملک انا بروک آ وخت (مستقبل) ءِ تہار کننگ خوارہ ولے قوم و ریاست اوفتا ناپاک ارادہ غاتے ہچ وڑاسے ٹی سرسہب مننگ کن اِلیپک ۔ تعلیمی ادارہ غاتا  رکھ حکومت نا اولیت آتیٹی اوار ءِ۔چیئرمین سینیٹ جلہو آتیٹی ٹھپی  مروک آ پولیس کارندہ غاتیکن زوت جان جوڑی نا دعا کرے و تعلقدار کمامدار آتے پارت کرے کہ ٹھپی تے گچین طبی آسراتی دمدستی وڑاٹ فراوان کننگے۔ اومستی پارے کہ ریاست شہید آتا قربانی تے مدام قدر انا نظر اٹ ہرک و اوفتا خاہوت آتے تنیا اِلنگ پننگک۔