پاکستان و سعودی عرب نا اقتصادی و دفاعی تعلقداری تیٹی اہم پیش رفت

اسلام آباد۔ 25 فروری (اے پی پی)سپیشل انویسٹمنٹ فسیلیٹیشن کونسل(ایس آئی ایف سی )نا کمک اٹ پاکستان و سعودی عرب نا نیام اٹ  اقتصادی و دفاعی تعلقداری  پوسکن آ بڑزی تا کنڈآ ہِننگ  ءُ۔ ایس آئی ایف سی نا کمامدار آتا رد اٹ، ساڑی آ دفاعی معاہدہ غان پد ہڑتوم آ برادر ملک آک اقتصادی کمکاری ءِ پین ودفنگ کن اسہ پوسکن ءُ سٹریٹجک معاہدہ سے نا خڑک آ رسینگانو۔سعودی عرب نا سفیر نواف بن سعید المالکی پارے کہ پاکستان و سعودی عرب نا تعلقداری تیٹی بھلوپیش رفت اس نظر بننگ اٹی ءِ ۔ او پارے کہ مسہ تُو مست ہڑتوم آ ملک آتا نیام اٹ اسیجائی  دفاعی معاہدہ غا دستخط مس، ہرا اسہ ایلو آ پت و شریداری نا درشانی ءِ ۔سعودی سفیر پارے کہ ہڑتوم آملک آک پین اسہ اہم ءُ سٹریٹجک ڈٹ اسے نا تیاری ءِ کننگ اٹی ءُ، ہرا پاکستان و سعودی عرب نا زرگزران کن بھاز اہم جوڑ مریک۔ او پارے کہ اقتصادی کمکاری  نا اسہ جوان  ءُ فریم ورک اسے نا بناء آ ہم اتفاق مسنے، ہرا نا مسخت واپار  و زرکاری  ءِ سوگو کننگ ءِ ۔دا فریم ورک نا رداٹ توانائی، صنعت، کان کنی (مائننگ)، آئی ٹی، سیل و سوات، کشت وکشار و خور ا نا سلامتی کون آ بشخ آتیٹی اسیجاٗی ڈٹ اوار مریرہ ۔ داکان بیدس، ہڑتوم آ ملک آک بجلی نا جہانی کنکشن ڈٹ اکن ہم مفاہمتی یات داشتآ دستخط کرینو۔گدرینگوک آ چندی سال آتیٹی پاکستان و سعودی عرب نا نیام اٹی 34 مفاہمتی یات داشت آتیا دستخط مسنے، ہرافتا مچ آ مالیت 2.8 ارب ڈالر ءِ ۔ کمامدار آتا رد اٹ  پاکستان اٹی دفاعی و اقتصادی تعلقداری تا مون آ دننگ اٹ ایس آئی ایف سی نا اہم ءُ کڑد اس ادا کننگ ءِ ، ہرا زرکاری نا عمل ءِ ترند و گچین جوڑ کننگ کن مربوط حکمت عملی آ کاریم کننگ ءِ۔