اقوامِ متحدہ نا جنرل اسمبلی ٹی جنگ بندی نا قرارداد منظور، پاکستان رائے شماری ٹی بشخ ہلتو

اقوامِ متحدہ۔ 25 فروری (اے پی پی)اقوامِ متحدہ نا جنرل اسمبلی یوکرین جنگ انا چار سال پورو مننگ آ دمدستی و بے شڑت جنگ بندی نا خواست آ تالان قرارداد اس منظور کرے، ولے پاکستان دا رائے شماری ٹی بشخ ہلتو۔قرارداد نا حق اٹی 107 وونٹ بس، وخت  اس کہ 12 ملک آک دا نا مخالفت ءِ کریر و 51 ملک آک رائے شماری ٹی بشخ ہلتور، ہرافتے ٹی پاکستان ہم اوار ئس۔ قرارداد یوکرین نا کنڈ آن پیش کننگاسُس و اودے 46 ملک آتا تائید دوئی ئس۔ منظور مروک آ متناٹی جنگ انا علاقائی و جہانی اثر آتے تالان کرسا روس انا کنڈ آن شاری آبادی، سویلین تنصیبات و توانائی نا اہم انگا ڈھانچہ غاتیا جلہو آتیا سخت گڑتی نا درشانی ءِ کننگا۔ قرارداد اٹی یوکرین نا وتواجہی ،آجوئی ، سیوت و علاقائی سالمیت بشمول علاقائی دیر نا شرف نا عزم انا درشانی ءِ کننگا ۔قرارداد اٹی دمدستی ، پورو و بے شڑت جنگ بندی نا خواست کرسا جنگی بندی تا پورو ہل و تس ، غیر کانودی وڑاٹ بندی مروک آ بندغ آتا یلہ کننگ و  و زور اٹ بے دخل کروک آشاری تا، خاص وڑاٹ چناتا، پدی اتنگ  آ زور شاغنگا۔قرارداد نا محرک آتا رداٹ دا ووٹنگ روسی جلہو نا برسی نا وخت آ یوکرین تون جہانی یکجہتی نا اسہ امتحان اس ئس۔ ایلو کنڈ آ، امریکہ قرارداد آ’’موشن فارڈویژن ‘‘پیش کرسا پس منظر نا ارٹ میکو پیراگراف و کارروائی نا بابت ایلو شق ءِ جتا وونٹنگ کن پیش کننگ نا سلاہ تس۔