روس۔یوکرین جنگ پنچ میکو سال اٹی پُترینگا ، اقوام متحدہ ٹی پاکستان نا سفارت کاری و دمدستی جنگ بندی آ زور

اقوام متحدہ۔ 25 فروری (اے پی پی)اقوام متحدہ ٹی پاکستان روس۔یوکرین جنگ نا چار سال پورو مننگ و جنگ نا پنچ  میکو سال اٹی پُترنگ نا وخت آ برجاسفارتی کوشست آتیان پورو فائدہ ہرفنگ و دمدستی جنگ بندی نا کمک اٹ جھیڑہ نا پرامن و مذاکراتی ایسر نا کنڈ آ پیش رفت آ زور شاغانے۔ ۔اقوام متحدہ ٹی پاکستان نا آخبتی مندوب عاصم افتخار احمد اقوام متحدہ نا سلامتی کونسل نا بڑزکو کہول انا دیوان آن تران کرسا پارے کہ پاکستان دا جھیڑہ نا اولی دے آن ہی ہیت و گپ و سفارت کاری نا موقف آ سلوک ءِ ۔ او پارے کہ ننے پورو یقین ءِ کہ دا جھیڑہ نا ہچ ءُ فوجی ایسر اس اف۔منصفانہ و دیرپا امن بیرہ بامعنی، منظم و برجا مذاکرات نا کمک اٹ ہی دوئی مننگ کیک، ہرا نا بناء دمدستی جنگ بندی آن بایدے مرے۔ سلامتی کونسل نا 15 باسکی دیوان ہندن ءُ وخت اس اڈ ہلک ہراتم ساڑی آ تُو تیٹی یوکرین نا شاری انفراسٹرکچر آ روسی جلہوآتیٹی ترندی بسنے۔ کونسل دا کان مست جنگ انا 3 سال پورو مننگ آ قرارداد 2774 (2025) منظور کرینے، ولے 2025 نا سال شاری تیکن بھاز جانی نسخان نا سال اس جوڑ مس۔پاکستانی مندوب پارے کہ ہچ ءُ ہم مذاکراتی فیصلہ اسے کن اقوام متحدہ نا چارٹر نا اصول آتیا عمل کننگ، غٹ فریق آتا رکھ انا فائدہ غاتے مون آتخسا ہڑتوم آ کنڈ آتے قبول مروک ءُ ایسر اس پٹنگ و ڈیہہ اٹی پائیدار سوگوی نا ضمانت المی ءِ ۔