وزیر دفاع خواجہ آصف ءَ اقتصادی دیمروئی، برآمدات ءِ دیمروئی ءُ آیوکیں وفاقی بجٹ ءِ ھوالگ ءَ مزن وزیر ءِ ھاسیں کمکار ءَ گوں گند ءُ نند

اسلام آباد۔25فروری  (اے پی پی): وزیر دفاع خواجہ محمد آصف ءَ مزن وزیر ءِ صنعت ءُ کامرس ءِ ھاسیں کمکار ہارون اختر خان ءَ گوں گند ءُ نند کتگ ءُ پاکستان ءِ اقتصادی دیمروئی، برآمدات ءِ دیمروئی ءُ آیوکیں وفاقی بجٹ ءِ ھوالگ ءَ گپ ءُ تران کتگ۔ وزارت صنعت ءُ کامرس ءِ نیمگ ءَ جاڑی بوتگیں بیان ءِ رد ءَ ستلاکوٹ چیمبر آف کامرس اینڈ انڈسٹری ءِ ڈل ءَ ھم دیوان ءَ بھر زرتگ ءُ آیوکیں بجٹ ءِ واستہ وتی شون ءُ سفارش پیش کتگ اَنت۔ گند ءُ نند ءِ ساھت ءَ ھارون اختر خان ءَ گوشت کہ آیوکیں بجٹ صنعت دوست ءُ کاروبار دوست بیت، ایشی ءِ مول ءُ مراد کاروباری برات آناں ریلیف ءُ ترغیب دیگ اِنت۔ آئی ءَ گوشت کہ ٹیکس آنی تہ ءَ نرمی ءُ ترغیب آنی واستہ تجویز آنی سر ءَ چار ءُ تپاسی کنگ بوھگ ءَ اِنت ءُ حکومت عملی ءُ دیمروئی ءِ رد ءَ گامگیج آناں بجٹ ءِ بھر جوڑ کنگ ءِ واستہ جزم اِنت۔ آئی ءَ اے گپ ءِ سر ءَ زور پر دات کہ پاکستان ءِ اقتصادی دیمروئی حکومت ءِ اولی ترجی اِنت۔ مزن وزیر شہباز شریف ءِ ہدایت ءِ رد ءَ برآمدات ءِ تہ ءَ گیشی ءُ راجی معیشت ءِ برجائی ءِ واستہ توامیں وزارت شپ ءُ روچ کار کنگ ءَ انت۔ ہارون اختر خان ءَ گیش گوشت کہ مزن وزیر ءِ وژن ءِ رد ءَ پاکستان ءِ راجدپتر ءَ اولی رند ءَ راجی صنعتی پالیشی جوڑ کنگ بوتگ، ایشی ءَ چہ پائیدار صنعتی دیمروئی ءِ واستہ یک سرجمیں فریم ورک ءِ پجاری بیت۔ ملک ءَ سرمایہ کار آناں آسراتی ءُ کاروبار ءِ تہ ءَ آسانی ءِ واستہ ریگولیٹری اصلاحات ءُ نوکیں پالیشی جوڑ کنگ بوتگ انت۔ اے موہ ءِ سر ءَ خواجہ محمد آصف ءَ گوشت کہ مھکمیں معیشت ءِ واب ابید صنعتی دیمروئی ءَ پیلو بوت نہ کنت۔ آئی ءَ اے گپ ءِ سر ءَ زور پر دات کہ داں کاروباری برات آناں گیش ءَ چہ گیش آسراتی پجاری کنگ مہ بیت ملک برجمیں دیمروئی ءُ وشھالی ءِ نیمگ ءَ دیم ءَ شُت نہ کنت۔ ھاسیں کمکار ءَ دل یکیمی دات کہ تاجر ءُ صنعت کار آنی پنت ءُ شون بجٹ جوڑ کنگ ءِ عمل ءَ ھوار کنگ بنت تانکہ جامع ءُ جوانیں اقتصادی منصوبگ بندی ءَ را یکجا کنگ بہ بیت۔