چیئرمین مزن وزیر ورنا پروگرام رانا مشہود احمد خان ءَ مزن وزیر ورنا کاروبار ءُ ایگریکلچر لون سکیم  ءِ  امپیکٹ رپورٹ  جاڑی

اسلام آباد۔24فروری  (اے پی پی):چیئرمین مزن وزیر ورنا پروگرام رانا مشہود احمد خان ءَ مزن وزیر ورنا کاروبار ءُ کشت ءُ کشاری وام ءِ اسکیم ءِ  رپورٹ شنگ کتگ کہ دولت مشترکہ ءِ سیکرٹریٹ ءِ تکنیکی کمک ءَ تیار کنگ بوتگ۔ اے موہ ءِ سر ءَ مزن وزیر ورنا پروگرام ءِ چیر دستی ءَ ھاسیں فن ٹیک ڈویژن ءِ جوڑ کنگ ءِ ھم باقاعدہ جار جنگ بوت۔ اے مراگش پی ٹی وی ءِ بنجاہی کارگس اسلام آباد ءَ برجم دارگ بوت ایشی ءِ تہ ءَ میڈیا ءِ نمائندگ، پالیسی ساز ءُ مالیاتی ادارگ آنی مزن مزنیں کارندہ آنی بھر زوری بوت۔ مراگش ءَ گوں گشتانک دیان ءَ چیئرمین مزن وزیر ورنا پروگرام رانا مشہود احمد خان ءَ گوشت کہ پاکستان ءَ ورنا آناں بااختیار جوڑ کنگ ءِ ایجنڈا نوں ایوک ءَ پالیسی جوڑ کنگ ءَ گوں بندوک نہ اِنت بلکینگ ءَ پیمائش ءِ لائکیں عملی گامگیج آنی تہ ءَ بدل بوتگ۔ آئی ءَ گوشت کہ حکومت وانگ ءُ زانگ، روزگار ءُ کاروباری موہ آنی پڑ ءَ ورنا آنی واستہ سرجم ءَ میرٹ ءِ سر ءَ بنیات ءُ ٹیکنالوجی ءِ سر ءَ بنیات ءِ نظام ءَ را دیم ءَ آرگ ءَ انت۔ آئی ءَ گوشت کہ ورنا آنی ایجنڈا نوں ڈیلیوری، ڈیٹا، پالیسی فریم ورک ءُ جوانیں رنگ ءَ عمل درآمد ءِ سر ءَ بنیات اِنت۔ آئی ءَ گوشت کہ مزن وزیر محمد شہباز شریف ءُ قائد محمد نواز شریف ءِ برجاھیں سیاسی سرپرستی ءَ چہ خالص میرٹ ءِ بنیات ءَ زھگ ءُ ورنا آنی تہ ءَ سرمایہ کاری ءِ اصلاحی عمل ءَ را تسلسل ءُ وسعت داتگ۔ آئی ءَ گوشت کہ ڈیجیٹل ٹرانسفارمیشن پی ایم وائی پی ءِ مستریں ستون اِنت ءُ آیوکیں 18ماہ ءِ تہ ءَ سرجمیں ملک ءَ توامیں یونیورسٹی آناں یکجائی ڈیجیٹل فریم ورک ءِ چیر دستی ءَ آرگ بیت۔ اے گامگیج ءَ چہ ہائیر ایجوکیشن سسٹم ءَ را ڈیجیٹل رنگ ءَ یکجا کنگ بیت، نودربر آنی واستہ وانگ ءُ زانگ ءَ چہ روزگار ءِ نیمگ ءَ رھادگ بوھگ ءَ را آسان کنگ بیت ءُ ڈیٹا ءِ سر ءَ کار کنوکیں گورننس ءَ را دیمروئی دیگ بیت۔ آئی ءَ ڈیجیٹل یوتھ ہب ءِ پیشرفت ءِ ھم گپ جت کہ پاکستان ءِ اولی یکجاھیں آن لائن پلیٹ فارم اِنت ءُ ورنا آنی دست ءَ ھستیں موہ آناں یکجا کنت۔ سافٹ لانچ ءَ پد اے پلیٹ فارم ءِ سر ءَ 800,000 ءِ کساس ءَ مردماں رجسٹرڈ کتگ، اے وھد ءَ 100,000 ءَ چہ گیش نوکری ءِ موہ، 20,000 ءَ چہ گیش اسکالرشپ، تربیت ءِ وسیلگ ءُ سرٹیفائیڈ پروگرام پلیٹ فارم ءِ سر ءَ دستیاب اَنت، وھدے کہ آیوکیں ھپتگ ءَ اے سرجمی ءَ کار بندات کنت۔ مزن وزیر ءِ کارگس، صوبائی سر وزیر آنی کارگس ءُ شریکیں ادارگ آناں گوں سیادی داروکیں ڈیش بورڈ آنی وسیلگ ءَ شفافیت ءُ احتساب ءَ را دل یکیمی کنگ بیت۔ رانا مشہود احمد خان ءَ گوشت کہ پی ایم وائی پی ءِ بنیات وانگ ءُ زانگ، شمولیت، چاگرد ءُ روزگار ءِ چار ستون آنی سر ءَ اِنت، ایشی ءِ چیر دستی ءَ لیپ ٹاپ اسکیم، ڈینش اسکول ءُ پنجاب ایجوکیشن اینڈومنٹ فنڈ ءِ تہ ءَ گیشی ءِ وڑیں گامگیج آنی وسیلگ ءَ لاکھوں مردماں فائدگ رستگ۔ آئی ءَ جار جت کہ پنجاب ڈینش اتھارٹی ءَ را پاکستان ڈینش اتھارٹی ءَ اپ گریڈ کنگ بوتگ ءُ آیوکیں بھر ءَ ملک ءِ اولی ڈینش یونیورسٹی جوڑ کنگ بیت تانکہ معیاری وانگ ءُ زانگ ءِ یک پیمیں رسائی ءَ را دیمروئی دیگ بہ بیت۔ ورنا آنی کاروباری ھوالگ ءَ آئی ءَ گوشت کہ پی ایم وائی اینڈ اے ایل ایس ءِ بجٹ ءَ را 2026-27 ءِ واستہ 200ارب ءَ چہ 300ارب ءَ گیش کنگ ءِ تجویز پیش کنگ بوتگ۔ ٹائر تھری ءِ وام ءِ حد ءَ را گیش کنگ ءِ سر ءَ ھم ھیال ءُ لیکہ کنگ بوھگ ءَ اِنت کہ اے وھد ءَ 7.5ملین کلدار اِنت ءُ ایشی ءَ را 20 ءَ چہ 30ملین کلدار ءَ سر کنگ بوھگ ءَ اِنت کہ ایشی ءَ چہ ورنا کاروباری مردم آنی تہ ءَ گیشی ءِ درشان اِنت۔ لیبر مارکیٹ ءِ اصلاحات ءِ حوالہ ءَ آئی ءَ گوشت کہ لیبر فورس ءِ سروے نوں ہر چار سال ءِ بدل ءَ سالانہ بنیاد ءَ کنگ بوھگ ءَ انت تانکہ پالیسی سازی ءَ را گیش موثر جوڑ کنگ بہ بیت۔ کابینہ ءِ نیمگ ءَ منظور بوتگیں راجی ورنا آنی روزگار ءِ پالیسی ءَ زالبول آنی کار ءِ تہ ءَ بھر زوری ءَ را کم چہ کم 35درسد ءُ نوکیں کمپنی آنی رجسٹریشن ءِ تہ ءَ ورنا آنی سروکی ءَ کاروبار آنی بھر ءُ بانگ ءَ را کم چہ کم 10درسد ءَ را گیش کنگ ءِ ٹارگٹ ایر کنگ بوتگ۔ اوورسیز پاکستانی آنی ھوالگ ءَ آئی ءَ گوشت کہ خلیج ءِ ملک آنی تہ ءَ کم آمدنی ءِ پاکستانی مزدور آنی واستہ ڈیجیٹل بینک اکاؤنٹ بندات کنگ بوتگ تانکہ باقاعدہ چینل آنی وسیلگ ءَ زرّ دیم دیگ ءَ را دیمروئی دیگ بہ بیت۔ وزارت خزانہ، تجارتی بینک ءُپاکستان ءِ اسٹیٹ بینک ءِ کمک ءَ اے سال ءَ یک لکھ ءَ چہ یک ملین اکاؤنٹ پچ کنگ ءِ ٹارگٹ ایر کنگ بوتگ وھدیکہ دراجیں مدت ءِ ٹارگٹ 4.4 ملین اکاؤنٹ انت۔ اے گامگیج ءَ چہ سالانہ یک ارب ڈالر ءِ گیشیں زرّ ءِ دیم دیگ ءِ گمان اِنت۔ گشتانک ءِ گڈ ءَ رانا مشہود احمد خان ءَ میڈیا، مالیاتی ادارگ ءُ وانگ ءُ زانگ ءِ شوبگ ءِ نمائندگ آناں زور پر دات کہ آ نفاذ ءِ پڑ ءَ سرگرم شریک بہ بنت۔ آئی ءَ گوشت کہ پاکستان یک انچیں دور ءِ تہ ءَ داخل بوھگ ءَ انت کہ اودا میرٹ، ہنر ءُ موہ آنی بنیاد ءَ ورنا آنی دیمروئی ءَ را دل یکیمی کنگ بیت، ایشی ءَ را ادارگی اصلاحات ءُ ڈیجیٹل سسٹم آنی کمک ءِ وسیلگ ءَ حاصل کنگ بیت، ءُ وتی مرضی ءِ پیسلہ آنی بنیاد ءَ نہ بیت۔