جی الیون کورٹ ءِ بمب تراک ءَ آماچیں مردمانی واستہ یک ٹوھیں کمکی پیکج ءِ تیار کنگ بوتگ، وزیر ءِ کانود اعظم نذیر تارڑ

اسلام آباد۔24فروری  (اے پی پی): وفاقی وزیر برائے کانود ءُ انصاف اعظم نذیر تارڑ ءَ گوشت کہ مزن وزیر محمد شہباز شریف ءِ پنت ءُشون ءِ رد ءَ ترندیں گامگیج چست کنگ بوتگ ءُ نوں سرجمیں ریلیف پیکج جوڑ کنگ ءُ منظور کنگ بیت۔ سئے شمبے ءِ روچ ءَ اسلام آباد ءِ جی الیون آمید گس ءِ دپ ءَ بمب تراک ءَ آماچیں مردمانی واستہ کمکی پیکج ءِ ھوالگ ءَ آئی ءَ گوشت کہ اے وئیل سکیں گرانیں رنگ ءِ بوتگ ءُ سرکار ءِ نیمگ ءَ زوت ءُ جوانیں رنگ ءَ پسو داتگ۔ آئی ءَ گْوشتگ کہ تراک ءِ تہ ءَ بازیں وکیل شہید ءُ ٹپی بوتگ اَنت کہ آیانی تہ ءَ آمیدگس ءِ ورنائیں وکیل ھم ھوار اِنت۔ وزیر ءِ کانود ءَ گوشت کہ من وت ءُ تہی کارانی وزیر ترندیں وھد ءَ جاہ ءَ سر بوتگ آں ءُ ٹپیگ آناں نادراھجاہ ءَ سر کنگ ءِ عمل ءِ نگرانی کتگ۔ آئی ءَ گوشت کہ ٹپی آنی درمان ءِ سر ءَ وت نگرانی کتگ ءُ نادراھجاہ ءَ ھوار آں ۔ اعظم نذیر تارڑ ءَ گوشت کہ وزارت کانود ءُ انصاف ءَ ترندیں رنگ ءَ شہید بوتگیں وکیل ءِ ھاندان ءَ گوں رابطہ کتگ، وھدیکہ مزن وزیر محمد شہباز شریف ءِ پنت ءُشون ءِ رد ءَ کمکی گامگیج بندات کنگ بوتگ انت، ٹپی آناں دوا ءُ درمان ءِ آسراتی پجاری ءِ گوما مالی کمک ھم کنگ بوتگ۔ آئی ءَ ایوان ءَ را ھال دات کہ مزن وزیر محمد شہباز شریف ءِ منظوری ءَ گوں یک سرجمیں ریلیف پیکج ءِ منظوری دیگ بوتگ ءُ آیوکیں یک ءُ دو روچ ءَ ریلیف فنڈز ءِ بھر ءُ بانگ ءِ ھوالگ ءَ سرجمیں ھال جاری کنگ بیت۔ وزیر ءِ کانود ءَ گشتگ کہ حکومت وتی زمہ واری ءَ پیلو کنت ءُ ہچ وڑیں لاپرواہی نہ کنت۔