جی الیون کچہری بمب دھماکہ نا زہمی تیکن وزیراعظم شہباز شریف نا منظوری اٹ اسہ جوان ءُ کمکی پیکج اس تیار مسنے، وزیرکانود اعظم نذیر تارڑ

اسلام آباد۔ 24 فروری (اے پی پی)بنجائی وزیرِ کانود و انصاف سینیٹر اعظم نذیر تارڑ پارینے کہ وزیراعظم محمد شہباز شریف نا پارت آ دمدستی گام گیج چست کننگا و داسہ اسہ پورو ءُ کمکی پیکج اس تیار کرسا منظور کننگانے۔سے شنبے نادے آپارلیمنٹ نا ایوانِ بالا (سینیٹ) نا دیوان اٹی اسلام آباد نا جی الیون کچہری نا پیشن مروک آ بمب دھماکہ نا زہمی تیکن کمکی پیکج نا بابت او پارے کہ دا واقعہ بھاز سنجیدہ نوعیت نا ئس و حکومت دمدستی و گچین وڑاٹ ورندی تس۔ او پارے کہ دھماکہ ٹی چندی وکیل آک شہید و ٹھپی مسر ہرافتے ٹی  سپریم کورٹ نا اسہ ورنا ءُ وکیل اس ہم اوار ئس۔وزیرکانود پارے کہ او تینٹ و وزیرِ داخلہ دمدستی وڑاٹ واقعہ نا جاگہ غا رسینگار و ٹھپی تے ہسپتال آ گدریفنگ نا کاریم نا چاروکی ءِ کریرو ہسپتال اٹی ساڑی ئسر۔ اعظم نذیر تارڑ پارے کہ شہید وکیل نا خاہوت تون وزارتِ کانود و انصاف دمدستی رابطہ کرے، وخت اس کہ وزیراعظم محمد شہباز شریف نا پارت آ کمکی گام گیج آتا بناءِ کننگا ،ٹھپی  تا درمان نا آسراتی تون اوار مالی کمک ہم کننگا۔او ایوان ءِ معلومدار کرے کہ وزیراعظم محمد شہباز شریف نا منظوری اٹ اسہ جوان  ءُ کمکی  پیکج اس منظور مسنے و کمک نا زر انا بشخ و بانٹ نا بابت سرجم حوال آتے اسہ اِرادے اٹی جاری کننگک ۔ وزیرِ کانود نا پاننگ ئس کہ حکومت تینا زمواری ءِ پورو کیک و  ہچ ءُ ڈیوالئی  اس کننگپک ۔