وزارتِ مذہبی امور و وزارتِ آئی ٹی نا نیام اٹ ’’حج ڈیجیٹلائزیشن‘‘ کن معاہدہ

اسلام آباد۔ 24 فروری (اے پی پی)وزیراعظم شہباز شریف نا وژن و خاص پنت و شون تا رداٹ حج آپریشن تے پورو وڑاٹ پوسکن کننگ کن اسہ اہم ءُ  پیش رفت اسے نا وڑاٹ بنجائی وزارتِ مذہبی امور و بنجائی  وزارتِ انفارمیشن ٹیکنالوجی نا نیام اٹ حج ڈیجیٹلائزیشن کن مفاہمتی یادداشت (ایم او یو) آ دستخط کننگانے۔دا ڈٹ و ڈول نا رداٹ حج 2027 نا غٹ ریسہ غاتے درخواست نا دوئی کننگ آن ہلیس پدی اسکان پورو وڑاٹ ڈیجیٹل مریک۔ بنجائی وزیرِ مذہبی امور سردار محمد یوسف دا وخت آ پارے کہ وزیراعظم نا پیدوار پارت ئس کہ حاجی تیکن مچ آ عمل ءِ آسان و صاف وشفافجوڑ کننگے۔ او پارے کہ سعودی عرب مہالو آن ہی تینا غٹ حج انا کاریم تے ڈیجیٹلائز کرینے، ننا دا گام آن جہانی کہول انا ہدف آتے دوئی کننگ اٹی کمک ملک و حاجی تے گچین آسراتی دُوبریک۔وزیرِ مملکت آئی ٹی و ٹیلی کام شزافاطمہ خواجہ پارے کہ ہڑتوم آ وزارت آتا نیام اٹ دا معاہدہ آن پدداسہ حج درخواست آن ہلیس غٹ کاریم ڈیجیٹل مریرہ  ۔ دا پوسکن آ نظام آن کاریم نا رفتار ودک  و انسانی غلطی یا ہُرے  مننگ نا گڑتی چٹک ۔مفاہمتی یات داشت آ ڈی جی نیشنل انفارمیشن ٹیکنالوجی بورڈ (این آئی ٹی بی) ڈاکٹر خالد رفیق و جوائنٹ سیکرٹری حج محمد بخش سانگی ئسک دستخط کریر۔ دا وخت آ ہڑتوم آ وزیر آک ساڑی ئسر۔ دیوان اٹی وفاقی سیکرٹری مذہبی امور ڈاکٹر ساجد محمود چوہان و سیکرٹری آئی ٹی ضرار ہاشم خان ئسک ہم شریک ئسر۔دا ایم او یو نا رداٹ حج 2027 کن ’’اینڈ ٹو اینڈ‘‘ (End-to-End) ڈیجیٹلائزیشن نا نظام درستی راستی  کرفنگ انگ ءِ، ہرانا رداٹ  حج درخواست فارم نا عمل ڈیجیٹلائز کننگک۔ قرعہ اندازی اٹی ’’پہلے آئیے پہلے پائیے‘‘ (ہرا اول بریک ہندا اول دوئی کیک) نا رداٹ سرسہب مروک آ خوش نصیب آتے ای میل نا کمک اٹ دمدستی حوال تننگک ۔ حج ٹریننگ نا شیڈول، حاضری، فلائٹ پلان، ویزا، ویکسینیشن، و سعودی عرب اٹی ہنکین و ہِن و بر (ٹرانسپورٹ) نا غٹ سرجم آتے موبائل ایپ نا کمک اٹ فراوان کننگک ۔