او آئی سی کامسٹیک نا کوآرڈینیٹر جنرل نا اسلامی ملک آتا سفیر آتا اعزاز اٹی باملنگ بیابخیری اس

اسلام آباد۔ 24 فروری (اے پی پی): پاکستان اٹی تعینات اسلامی ملک ، مبصر اور ایلو سنگت ملک آتا سفیر آتا اعزاز اٹی او آئی سی کامسٹیک نا کوآرڈینیٹر جنرل پروفیسر ڈاکٹر محمد اقبال چوہدری تدوک آ دے داڑے اسہ پروقارءُ افطار ڈنر اسے نا بست و بند ءِ کرے ۔دا بیابخیری ٹی چندی ملک آتا سفیر، ہائی کمشنر، سفارت کار اور اوفتا نمائندہ غاک بھلو کچ اسے ٹی بشخ ہلکرہرا او آئی سی نا باسک ملک آتا اور سنگت ملک آتا نیام اٹ کمکاری، یکجہتی اور تین پہ تینی شرف نا سوگو جوزہ غاتا پیدوار درشانی اس ئس۔دا وخت آ کوآرڈینیٹر جنرل مہمان آتے کامسٹیک نا برجاسرجزو، اہم ڈٹ ، اسٹریٹجک گام گیج وفلیگ شپ پروگرام تابارو اٹ معلومدار کرے ، ہرافتا مسخت او آئی سی نا باسک ملک آتا نیام اٹ سائنس و ٹیکنالوجی، بڑزکو تعلیم، پٹ وپول  اور جدت نا بشخ آتیٹی کمک ءِ ودی کننگ ءِ۔درملکی سفیر آک باسک ملک آتا نیام اٹ سائنسی کمک ءِ ودی کننگ اور بڑزکو تعلیمی شریداری تے سوگو کننگ کن کامسٹیک نا برجا کوشست آتا سفت ءِ کریر۔ سفیر اور ہائی کمشنر آک پروفیسر ڈاکٹر محمد اقبال چوہدری نا متحرک سرکڑدہ ئی نا ستاءِ کرسا کامسٹیک نا کڑد ءِ او آئی سی ملک آتا نیام اٹ سائنسی کمک اور بڑزکو تعلیمی شریرداری نا مون آ دننگ اٹی بھاز اہم گوندار۔ او کامسٹیک نا کوشست آتے پائیدار شونداری، علمی ہل و تس  اور اسیجائی پٹ وپول نا مون آ دننگ کن گچین گوندار ۔دا بیابخیری ٹی ترکیہ، شام، یمن اور ایلو اسلامی ملک آتا سفیر آک ہم بشخ ہلکر۔