چیئرمین سینیٹ نا سعودی سفیر نواف بن سعید احمد المالکی نا کنڈ آن تروک آباملنگ  ڈنر اٹی بشخ ہلنگ

اسلام آباد۔ 24 فروری (اے پی پی)چیئرمین سینیٹ سید یوسف رضا گیلانی سعودی عرب نا سفیر نواف بن سعید احمد المالکی نا کنڈ آن تروک آ اسہ پروقارءُ افطار ڈنر اسے ٹی بشخ ہلک۔دا دود اٹی ملک انا بھلو کچ اسے ٹی  سیاسی، سفارتی و راجی شخصیت آک ساڑی ئسر۔ افطار ڈنر اٹی گورنر پنجاب سردار سلیم حیدر، گورنر خیبر پختونخوا فیصل کریم کنڈی، گورنر سندھ کامران ٹیسوری، بنجائی وزیر مذہبی امور سردار محمد یوسف، سینیٹر محمد طلحہ محمود، وزیراعظم پاکستان نا سلاہکارسیاسی امور سینیٹر رانا ثناء اللہ خان، وزیر مملکت داخلہ محمد طلال بدر، وزیر پارلیمانی امور طارق فضل چوہدری، رکن قومی اسمبلی خرم دستگیر خان و ایلو پارلیمنٹیرین آتون اوار سفارت کار، بیوروکریٹس، صحافی، پنی آ کاروباری شخصیت آک ، زرکار  و پوریاگرآک ہم ساڑی ئسر۔افطار نا وخت آ چیئرمین سینیٹ و سعودی سفیر نا نیام اٹ پاک-سعودی ہڑتوم آ کنڈآتا تعلقداری، علاقائی و جہانی حالیت، امتِ مسلمہ ءِ مون تروک آ چیلنج و چندی بشخ آتیٹی اسہ ایلو تون کمک ءِ ودفنگ نا بارو اٹ جوان گپ و تران مس۔ ہڑتوم آ راہشونک پاکستان و سعودی عرب نا نیام اٹ تاریخی، سوگو و برادرانہ تعلقداری تے پین سوگو کننگ و اوفتے پوسکن آ کسر آتیا دننگ نا عزم انا درشانی ءِ کریر۔چیئرمین سینیٹ سید یوسف رضا گیلانی خادمِ حرمین شریفین کن نیک است خواہی تا درشانی ءِ کرسا پارے کہ پاکستان، سعودی عرب تون تینا تعلقداری تے بھاز شرف و قدر انا نظر اٹ ہُرک۔ او پارے کہ ہڑتوم آ ملک آتا نیام اٹ مذہبی، دود و ربیدگی و سٹریٹجک رابطہ وخت اتون اوار پین سوگو مننگ ءُ، ہرا تین پہ تینی پت و یکجہتی نا اسہ روشن ءُ درور اسے ءُ۔دا وخت آ سعودی سفیر نواف بن سعید احمد المالکی پارے کہ سعودی عرب، پاکستان تون تینا تعلقداری تے خاص ءُ اہمیت اس ایتک۔ او دا عزم انا درشانی ءِ کرے کہ ہڑتوم آ برادر ملک آک ہرساعت اٹی اسہ ایلو نا موقف نا مخ تفی ءِ کرینو اور بروک آ وخت اٹی ہم دا کمک پین ودک۔