پاکستان ءِ سلاہ بندیں اُرد ءُ کانود ءِ نفاذ ءِ ادارگ ملک ءِ رکھینگ ءِ ھاترا جزم اَنت، ناشرکاری ءِ ھلاپ ءَ فیصلہ کنوکیں گامگیج برجاہ بیت، ڈاکٹر طارق فضل چوہدری

اسلام آباد۔23فروری  (اے پی پی):پارلیمانی کارانی وفاقی وزیر ڈاکٹر طارق فضل چوہدری ءَ گوشت کہ پاکستان ءِ سلاہ بندیں اُرد ءُ  کانود ءِ نفاذ ءِ ادارگ ملک ءِ رکھینگ ءِ واستہ جزم اَنت، آ وتی دفاع ءُ  شہری آنی رکھینگ ءِ واستہ ھرچ المی گامگیج زورگ ءِ حق ءَ دار اَنت، ناشرکاری ءِ ھلاپ ءَ فیصلہ کنوکیں کارروائی برجاہ اِنت۔ دوشمبے ءِ روچ ءَ اوگانستان ءِ جاورھال ءُ انوگیں ناشرکاری اُرشانی بابت ءَ وتی ھیالانی درشان کنان ءَ آئی ءَ بنو ءُ باجور ءَ وت کُش اُرشانی بابت ءَ گپ جتگ کہ ایشی ءِ تہ ءَ سیکورٹی فورسز ءِ افسر ءُ سپاھیگ شھید بوتگ اَنت۔ منسہرا ءِ شہیدیں افسرے ءِ حوالہ ءَ آئی ءَ گشتگ کہ آئی ءِ مات ءَ رسانکدر ءَ گوں تران کنان ءَ گشتگ کہ اگاں منی گیشیں چُک فوج ءَ بہ بنت من پہ ماتیں گلزمین ءَ ایشانی قربانی دیگ ءَ ساڑی آں ۔ پارلیمانی کارانی وزیر ءَ گوشت کہ شھید ءِ کسان سالیں جنک ءَ ھم وتی پت ءِ سر ءَ شان ءُ  شانت ءِ درشانی کتگ ءُ  آئی ءَ را وتی بُت گُشتگ۔ ڈاکٹر طارق فضل چوہدری ءَ گوشت کہ پاکستان ءِ سلاہ بندیں اُرد ءُ  کانود ءِ نفاذ ءِ ادارگ ملک ءِ رکھینگ ءِ واستہ جزم انت بلے راج ایوک ءَ جنازہ ءِ برگ ءِ واستہ تیار نہ انت۔ آئی ءَ گوشت کہ گوستگیں اُرش آنی بافت اوگانستان ءِ وڑ ءَ اِنت ءُ  اُرش کنوک ءُ  آسراتی ءِ تہ ءَ لھتے اوگان سرزمین ءِ ھال شنگ بوتگ۔ آئی ءَ ایوان ءَ را ھال دات کہ 21فروری ءَ اوگانستان ءِ صوبہ ننگرھار، پکتیہ ءُ  خوست ءَ انٹیلی جنس ءِ بنیات ءَ آپریشن کنگ بوتگ کہ ایشی ءِ تہ ءَ ناشرکاری نیٹ ورک ءِ مبینہ کلیدی مردم نشانگ جوڑ کنگ بوتگ اَنت۔ آئی ءَ گوشت کہ اے آپریشن گوں سکیں درستی ءَ کنگ بوتگ اَنت ءُ  ایوک ءَ ناشرکار آنی پناہ گاہ ءُ  تربیتی مراگش نشانگ جوڑ کنگ بوتگ اَنت۔ وفاقی وزیر ءَ اے گپ رد کتگ کہ اے اُرش شہری آبادی، مسیت یا مدرسہ ءِ نشانگ جوڑ کنگ بوتگ اَنت۔ وفاقی وزیر ءَ گوشت کہ حکومت انگت ءَ اوگانستان ءَ چہ ایمنی لوٹ ایت ءُ  لوٹ ایت کہ دوئیں ملک وت مہ وتی کمک ءِ وسیلگ ءَ ناشرکاری ءَ را ھلاس بہ کن اَنت، البت آئی ءَ اے گپ پدر کت کہ اگاں پاکستان ءِ ھلاپ ءَ کارروائی برجاہ بہ بنت گڈا ملک وتی دفاع ءِ ھک ءِ چیر دستی ءَ گامگیج برجاہ دار ایت۔ آئی ءَ گوشت کہ پاکستان ءَ را نزور لیکوکیں مردم آناں اے کلوہ رسگ لوٹ ایت کہ راج، سیاسی سروکی ءُ  سلاہ بندیں اُرد یکجائی ءَ اَنت۔ مزن وزیر ءُ فوجی سروکی ءِ جزم ءِ حوالہ ءَ آئی ءَ گوشت کہ ناشرکاری ءِ سرجمی ءَ ھلاسی ءَ تاں جہد ءُ کوشست برجاہ مان ایت۔ وتی کلوہ ءِ گڈسرا ڈاکٹر طارق فضل چوہدری ءَ شہیدانی ھاندان ءَ را شگر ءُ  شان دات ءُ  گوشت کہ اے کُربانی آں راج سلام انت۔ آئی ءَ گوشت کہ پاکستان ءِ ھمک شہری ءُ سیکورٹی کارندہ آنی ھون آنی حساب ءُ کتاب کنگ بیت ءُ گران بھائیں وطن ءِ ھمک انچ ءِ رکھینگ بیت۔