ہڑتوم آ کنڈآتا و کثیر جہتی شریدار آتون تدوک آ مالی سال 10.643 ارب ڈالر نا معاہدہ غاتیا دستخط مس، چین پاکستان نا غٹ آن بھلا شریدار سلیس، وزارتِ اقتصادی امور

اسلام آباد۔ 23 فروری (اے پی پی): ہڑتوم آ کنڈآتا و کثیر جہتی شریدار آتون تدوک آ مالی سال اٹی جم وڑاٹ 10.643 ارب ڈالر نا معاہدہ غاتیا دستخط کننگا۔ وزارتِ اقتصادی امور نا رِد اٹ درملکی اقتصادی کمکاری پدتموک آ ملک آتازرگزرانی  شون و السی راجی آسودہی ٹی بھاز اہم ءُ کِرد اس ادا کیک۔دا کمکاری بنداوی وڑاٹ کثیر الجہتی شونداری شریدار و ہڑتوم آ کنڈآتا شوناری شریدار آتا کنڈآن فراوان کننگک و دانا مسخت پدتموک زرگزران تے مالیاتی عدم توازن تون مون تننگ، زرمبادلہ نا کوڑی تے سوگو کننگ و پائیدار زرگزرانی شونداری کن ڈٹ آتا مالی کمکاری فراوان کننگ ءِ۔ رپورٹ نا رداٹ مالی سال 25-2024 اٹی پاکستان ہڑتوم آ کنڈآتا و کثیر الجہتی شریدار آتون 10.643 ارب ڈالر نا معاہدہ غاتیا دستخط کرے، دافتیان  5.061 ارب ڈالر مالیت نا معاہدہ غاک کثیر الجہتی شونداری شریدار آتون، 1.289 ارب ڈالر نا معاہدہ غاک ہڑتوم آ کنڈآتا شونداری شریدار آتون، وخت اس کہ 4.294 ارب ڈالر درملکی واپاری بینک آتون کننگا۔وزارتِ اقتصادی امور نا رِد اٹ تدوک آ مالی سال اٹی کثیر الجہتی شون داریی شریدار آتیٹی ایشیائی شونداری بینک 2.206 ارب ڈالر نا کمک نا قول کرے ہرا کثیر الجہتی شریدار آتا جم قول آتا 44 درسد مریک۔ ہڑتوم آ کنڈآتا شونداری  شریدار آتیٹی چین پاکستان نا کل آن بھلا شونداری شریدار سلیس۔ تدوک آ مالی سال اٹی چین پاکستان ءِ 584 ملین ڈالر نا مالی کمک فراوان کرے۔