پاکستان نا جہانی کرپٹو و مالیاتی فورم اٹی نمان بشخ ہلنگ

اسلام آباد۔ 23 فروری (اے پی پی) پاکستان جہانی ڈیجیٹل زرگزران اٹی تینا ودوک آ ساڑی گری نا اسہ پین شاہدی اس ترسا امریکہ ٹی اڈ ہلوک ورلڈ لبرٹی فورم اٹی فعال بشخ ہلک۔ پاکستان ورچوئل اثاثہ جات ریگولیٹری اتھارٹی نا چیئرمین بلال بن ثاقب فورم اٹی ملک انا نمائندگی ءِ کرے وڈیجیٹل میرات جات نا بابت پاکستان نا وژن ءِ جہانی برادری نا مون آ پیش کرے۔ چیئرمین بلال بن ثاقب فورم ءِ جہانی مالیاتی راہشون، کرپٹو اختراع کارو پالیسی ساز آتا اس اہم ءُ پلیٹ فارم اس گوندسا پارینے کہ داوڑنا جہانی مچی نئے بیرہ پالیسی ہم گرنچی ءِ مون آ دیک بلکن ڈیجیٹل مالیاتی نظام اٹی شفافیت، جدت و پائیداری کن اسیجائی حکمت عملی اس جوڑ کننگ اٹ ہم کمکار مریک۔ فورم اٹی جہانی شہرت یافتہ مالیاتی ادارہ و پلیٹ فارم آتا نمائندہ غاک بشخ ہلکر ہرافتے ٹی گولڈمین سکس، نیسڈیک، فرینکلن  ٹیمپلٹن و کوائن بیس تون اوار ایلو فک اوار ئسر۔ بشخ ہلوک آک ڈیجیٹل مالیات نا آخبت، ریگولیٹری فریم ورک و زرکاری نا پوسکن وارخواہی تیا سرجمی اٹ گپ وتران کریر۔ جہانی مالیاتی فورم اٹی ’’دی فیوچر آف اسٹیبل کوائنز ، ٹوکنائزیشن و فنانشل انوویشن ‘‘ نا سرحال آ خصوصی سیشن اس اڈ ہلک ہراٹی اسٹیبل کوائنز نا ضابطہ جاتی پلو، میرات آتا ٹوکنائزیشن نا گمان و سیم پار ادائیگی تیٹی بلاک چین ٹیکنالوجی نا کڑد آ گپ وتران کننگا۔