سیکورٹی فورس آک اوغانستان اٹی دہشت گرد آتا برخلاف سرسہب انٹیلی جنس بیسڈ آپریشن کریر، دانیال چوہدری

راولپنڈی ۔ 23 فروری (اے پی پی) بنجائی پارلیمانی سیکرٹری حوالکاری وشینکاری دانیال چوہدری پارینے کہ پاکستان نا سیکورٹی فورس آک   اوغانستان اٹی  دہشت گرد آتا برخلاف سرسہب انٹیلی جنس بیسڈ آپریشن کریر ہراٹی ملک اٹی دہشت گردی نا بھلا واردات آتیٹی اوار زموار آتے شست کننگا۔ اوپارے کہ دا زموار آک مسیت، مدرسہ، چنا، شاری و سیکورٹی فورس آتیا جلہو آتیٹی اوار ئسر۔ تینا بیان اٹی  اوپارے کہ ٹارگٹڈ کارروائی ٹی کم و ود 70دہشت گرد آتے جہنمی کننگا وخت اس  کہ مچ آآپریشن اٹی اسہ چنا یا سویلین اسے ہم نسخان رسینگتنے۔ او پارے کہ کارروائی بے کچ مہارت و پک اودیم معلومداری تا بنداو آ کننگا و بیرہ ہمو دہشت گرد آتے شست کننگا ہرا پاکستان آ جلہو آتیٹی براہ راست اوار ئسر۔ بیرسٹر دانیال چوہدری پارے کہ جہانی برادری و خاص کر اقوام متحدہ داہیت آن معلومدار ءِ کہ اوغانستان دہشت گرد گروہ تا رکھ پناہ گاہ جوڑ مسنے۔ اقوا م متحدہ نا اسہ رپورٹ اسے نا رداٹ 21 ملک آتا دہشت گرد گروپ اوغانستان اٹی ساڑی ءُ ہرا چندی ملک آتیٹی کارروائی تیٹی اوار ءُ۔ اوپارے کہ بھارت دا گروہ تا سرپرستی ءِ کرسا اوفتے تربیت و مالی کمک فراوان کننگ ءِ ہرانا نتیجہ ٹی او سلہہ ہلسا پاکستان اٹ دہشت گردی کارروائی کیرہ۔بنجائی پارلیمانی سیکرٹری مستی پارے کہ دا گروہ اوغان طالبا ن نا ہم دشمن ءِ و ہراتم اسکان اوفتے پورو چٹفنگپک دہشت گردی نا چرجوئی برجاسلک۔ اوپارے کہ دا خارجی اسلام نا پن ءِ کاریم اٹ اتیرہ ولے حقیقت اٹ اوفتا مسخت ڈیہہ  ءِ نزوری آن گواچی کننگ ءِ۔ اوپارے کہ مچ آ قوم دہشت گردی نا برخلاف متحد ءِ و تینا قومی ادارہ غاتون ہم کوپہ سلوک ءِ۔