وزارت خزانہ ءِ بیان ءِ رد ءَ پاکستان ءِ درملکی قرضہ گیشتر رعایتی ءُ دراجیں مدت ءِ رنگ ءَ انت

اسلام آباد۔22فروری  (اے پی پی):وزارت خزانہ ءَ اے گپ ءِ پدر کنگ ءَ انت کہ پاکستان ءِ درملکی قرضہ گیشتر رعایتی ءُ دراجیں مدت ءِ دروشم ءَ انت، 138ارب ڈالر ءِ کلیں زرّ ءَ نجی ءُ دگہ زمہ واری ھوار انت، وھدے کہ درملکی سرکاری قرضہ 92ارب ڈالر ءِ کساس ءَ انت، ایشی ءِ سر ءَ اوسط سود ءِ شرح 4درسد ءِ کساس ءَ انت؛ سود ءِ ادائیگی ءِ تہ ءَ انوگیں گیشی آئی ایم ایف پروگرام ءِ چیر دستی ءَ چہ دست کپتگیں گلوبل سود ءِ شرح ءُ فنڈنگ ​​ءِ تہ ءَ گیشی ءِ تناظر ءَ بوتگ پمیشکا درائیں قرضہ ءِ سر ءَ 8 درسد ءَ تاں سود ءِ ادائیگی ءِ تاثر راست نہ اِنت۔ یک شمبے ءِ روچ ءَ وتی بیان ءِ تہ ءَ وزارت ءِ ھزانگ ءَ اے گپ پدر کتگ کہ پاکستان ءِ کلیں درملکی قرضہ ءُ زمہ واری اے وھد ءَ 138ارب ڈالر اِنت۔ بلے اے زرّ ءَ ایوک ءَ سرکاری قرضہ ھوار نہ اِنت بلکیں سرکاری ءُ سرکاری ضمانت ءِ قرضہ، سرکاری شعبہ ءِ ادارہانی قرضہ (ضمانت ءُ غیر ضمانت)، بینک آنی درائیں ذمہ واری، نجی شعبہ ءِ قرضہ ءُ کمپنی آنی درملکی براہ راست سرمایہ کار آنی دیم ءَ انٹر کمپنی ءِ ذمہ واری ھم ھوار اَنت۔ پمیشکا اے کلیں زرّ ءَ چہ درملکی سرکاری قرضہ ءَ جتا چارگ بہ بیت کہ اے زرّ 92 ارب ڈالر ءِ کساس ءَ اِنت۔ ھمے رنگ ءَ کلیں درائیں سرکاری قرضہ ءِ تہ ءَ 75درسد ءِ کساس ءَ چہ کثیر جہتی ادارگ (آئی ایم ایف ءَ ابید) ءُ دو نیمگی دیمروئی شریک آنی نیمگ ءَ چہ زرتگیں رعایتی ءُ دراجیں مدتی وام ھوار اَنت۔ قرض ءِ تہ ءَ تھنا 7 درسد ءِ نزیک ءَ تجارتی بنیاد ءَ زورگ بیت ءُ دگہ 7 درسد دراجیں مدتی یوروبانڈز ءِ سر ءَ ھوار اِنت۔ اے جاور ھال ءِ تہ ءَ اے ھیال کہ پاکستان 8 درسد ءَ تاں درملکی قرضہ ءِ سر ءَ سود دیگ ءَ اِنت ، راست نہ اِنت ۔ مجموعی طور ءِ سرا درملکی سرکاری قرضہ ءِ سرا اوسط سود ءِ شرح 4درسد ءِ نزیک ءَ انت کہ ایشی ءَ چہ گیشتر رعایتی قرضہ ءِ عکاسی انت۔ سود ءِ ادائیگی ءِ رد ءَ درملکی سرکاری قرضہ ءِ سر ءَ سود ءِ کساس مالی سال 2022ءَ 1.99ارب ڈالر ءَ چہ مالی سال 2025ءَ 3.59ارب ڈالر ءَ سر بوتگ کہ ایشی ءِ تہ ءَ 80.4درسد ءِ گیشی بوتگ ، نہ کہ رپورٹ ءِ رد ءَ 84درسد۔ سود ءِ ادائیگی ءَ ھمے وھد ءَ 1.60 بلین ڈالر ءِ گیشی بوتگ ، نہ کہ 1.67 بلین ڈالر ءِ گیشی بوتگ ۔ اسٹیٹ بینک آف پاکستان ءِ ریکارڈ ءِ رد ءَ ھما وھد ءِ تہ ءَ جتا جتائیں کریڈیٹراں داتگیں زرّ چوش بوتگ اَنت: آئی ایم ایف ءَ سرجم ءَ 1.50 ارب ڈالر داتگ کہ ایشی ءِ تہ ءَ 580 ملین ڈالر سود بوتگ؛ نیا پاکستان سرٹیفکیٹ ءِ چیر دستی ءَ 1.56ارب ڈالر داتگ ات کہ ایشی ءِ تہ ءَ 94 ملین ڈالر سود ھوار ات؛ 1.54 بلین ڈالر ایشیائی دیمروئی بینک ءَ داتگ ات کہ ایشی ءِ تہ ءَ 615 ملین ڈالر سود ھوار ات؛ 1.25 بلین ڈالر ورلڈ بینک ءَ داتگ ات کہ ایشی ءِ تہا 419 ملین ڈالر سود ھوار ات؛ وھدے کہ 3 ارب ڈالر ءِ نزیک ءَ درائیں تجارتی وام ءِ تہ ءَ داتگ ات کہ ایشی ءِ تہ ءَ 327 ملین ڈالر سود ھوار ات۔ اگرچہ سود ءِ ادائیگی ءَ سرجمی ءَ گیشی بوتگ بلے اے گیشی ایوک ءَ وام ءِ حجم ءِ تہ ءَ گیشی ءِ سبب ءَ نہ اِنت۔ مالی سال 2022ءَ پد وام آنی کساس ءَ کمیں گیشی بوتگ بلے گیشتریں نوکیں فنڈز آئی ایم ایف ءِ برجاھیں پروگرام ءِ چیر دستی ءَ رعایتی کثیر جہتی وسیلگ ءُ توسیعی فنڈ سہولت (ای ایف ایف) ءَ چہ زرتگ اَنت۔ 2022-23ءِ ساھت ءَ پاکستان ءَ را ادائیگی ءِ توازن ءِ سکیں دباؤ ءِ آماچ بوتگ، ایشی ءِ آسر ءَ درملکی زرّ ءِ ذخیرہ درآمدات ءِ یک ماہ ءَ چہ کمیں کچ ءَ کپتگ۔ اے جاور ھال ءَ سرکار ءَ آئی ایم ایف ءِ گوما ای ایف ایف ءِ معاہدہ کتگ ءُ دگہ کثیر جہتی ءُ رعایتی وسیلگاں چہ زرّ زرتگ۔ اے گامگیجاں چہ درملکی زرّ ءِ ذخائر ءِ بحالی ءُ درائیں اکاؤنٹ ءَ را گہتر کنگ ءَ کمک رستگ۔ اے گپ ھم زانگ المی اِنت کہ سود ءِ ادائیگی ءِ تہ ءَ گیشی ھم جھان ءِ سود ءِ شرح ءِ تہ ءَ گیشی ءِ آسر اِنت۔ 2021-22 ءَ افراط زر ءِ تہ ءَ گیشی ءِ پد ءَ امریکی فیڈرل ریزرو ءَ مئی 2022 ءَ سود ءِ شرح ءَ 0.75-1.00 درسد ءَ چہ جولائی 2023 ءَ تاں 5.25-5.50 درسد ءَ گیش کتگ۔ عالمی سود ءِ شرح ءِ اے گیشی ءَ چہ وام ءِ ھرچ ءُ درچ گیش بوتگ کہ ایشی ءَ چہ درائیں سود ءِ ادائیگی ءِ سر ءَ ھم اثر کپتگ۔ حکومت ذمہ وار قرضہ ءِ انتظام، شفافیت ءُ اقتصادی استحکام ءِ ھاتر ءَ جزم انت۔ قرضہ ءِ ھوالگ ءَ ڈیٹا ءَ را راستیں تناظر ءَ پیش کنگ ءِ ھاتر ءَ سرپدیں راجی بحث ءِ ھاتر ءَ المی اِنت ءُ سیادی داروکیں کوارٹراں چہ لوٹ کنگ بیت کہ آ پاکستان ءِ درائیں قرضہ ءِ ڈھانچہ ءُ جھان ءِ مالیاتی جاور ھال آنی ھیال ءَ بہ دار اَنت۔