اوگانستان ءِ عبوری حکومت ءَ وتی مٹی ءَ را پاکستان ءِ ھلاپ ءَ ناشرکاری ءِ ھاترا کارمرد کنگ ءَ چہ بہ رکّین ایت، وزارت ءِ اھوالکاری

اسلام آباد۔22فروری  (اے پی پی):پاکستان ءَ گوستگیں وت کُشیں اُرشاں پد، ایشی ءِ تہ ءَ اسلام آباد ءِ امبارگاہ، بجور، بنّو ءُ پدا رمضان ءِ مقدسیں ماہ ءِ تہ ءَ وت بنّو ءَ ھوار، پاکستان ءِ گور ءَ اے گپ ءِ سرجمیں شواہد ھست کہ اے ناشرکاری کار اوگانستان ءَ خوارج ءِ سروکی ءُ ھنڈلر ءِ ھدایت ءِ سر ءَ کنگ بوتگ اَنت۔ وزارت اطلاعات ءُ نشریات ءِ بیان ءِ رد ءَ اے اُرشانی ذمہ واری اوگانستان ءَ جاہ منندیں پاکستانی طالبان ءَ ھم زرتگ کہ آ گوں فتنہ الخوارج ءُ آئی ءِ ھمگرنچیں گلاں ھمگرنچ اِنت ءُ اسلامی ریاست صوبہ خراسان ءَ ھم زرتگ۔ پاکستان ءِ بازیں رند ءَ اوگان طالبان ءِ سرکار ءَ را اوگان سرزمین ءِ کارمرد کنگ ءِ دیم ءَ دارگ ءِ ھاترا ٹھوس گامگیج زورگ ءِ لوٹ کنگ ءِ باوجود اوگانستان ءَ جاہ منندیں ناشرکاریں گل ءُ درملکی پراکسی پاکستان ءَ ناشرکاری کارروائی کن اَنت ءُ اوگان طالبان سرکار ایشانی ھلاپ ءَ ھچ وڑیں ٹھوس گامگیج زورگ ءَ ناکام بوتگ۔ پاکستان ءَ مدام دمگ ءَ امن ءُ ایمنی ءِ برجائی ءِ کوشست کتگ بلے ھمے وھد ءَ وتی شہری آنی ایمنی ءُ ایمنی مئے اولی ترجی اِنت۔ اے درستیں گپاں ھیال ءَ دارگ ءَ پاکستان ءَ پاکستان ءُ اوگانستان ءِ سیمسر ءِ دمگ ءَ یک سکیں راستیں انٹیلی جنس ءِ بنیاد ءَ آپریشن ءِ تہ ءَ پاکستانی طالبان ، ایف اے کے ءُ آئی ءِ ھمگرنچیں گل ءُ آئی ایس کے پی ءِ ھپت ناشرکاریں کیمپ ءُ پناہ گاہ نشانگ جوڑ کتگ اَنت۔ پاکستان ءَ چہ اوگانستان ءِ عبوری حکومت ءَ امیت انت کہ آ وتی ذمہ واریاں پیلو بہ کنت ءُ پاکستان ءِ ھلاپ ءَ خریجی ءُ ناشرکارانی نیمگ ءَ وتی سرزمین ءِ کارمرد کنگ ءَ را بہ رکین ایت، پرچا کہ پاکستان ءِ الس ءِ ایمنی مئے اولی ترجی انت۔ پاکستان ءَ اے ھم اُمیت اِنت کہ میاں اوستمانی براتی ءَ چہ طالبان حکومت ءَ را دوحہ ءِ معاہدے ءِ رد ءَ اوگان سرزمین ءِ دگہ ملک آنی ھلاپ ءَ کارمرد کنگ ءِ ھلاپ ءَ وتی زمہ واری آنی سر ءَ عمل کنگ ءِ سر ءَ زور پر دیگ ءَ جوانیں ءُ جوڑیشت ءِ کرد پیلو کنگ بیت کہ اے دمگی ءُ جھان ءِ امن ءُ ایمنی ءِ واستہ یک ھاسیں گامگیج اِنت۔