مزن وزیر شہباز شریف ءَ ضلع بنو ءَ فتنہ الخوارج ءِ ناشرکارانی نیمگ ءَ سیکورٹی فورسز ءِ کاروان ءِ سر ءَ اُرش ءِ سک باز مذمت کتگ

لندن۔21فروری  (اے پی پی):مزن وزیر محمد شہباز شریف ءَ ضلع بنو ءَ فتنہ الخوارج ءِ ناشرکارانی نیمگ ءَ سیکورٹی فورسز ءِ کاروان ءِ سر ءَ اُرش ءِ سک باز مذمت کتگ ءُ پاک فوج ءِ لیفٹیننٹ کرنل شہزاد گل فراز ءِ شہادت ءِ سر ءَ دلپدردی ءِ درشان کتگ ۔ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ اُرش ءَ شھید بوتگیں مردمانی پڑ برز کنگ ءِ دعا کتگ ءُ آوانی گس ءِ مردم آں گوں دل ءِ تہ ءَ ھمدردی ءُ دلپدردی ءِ درشانی کتگ۔ مزن وزیر ءَ سیکورٹی فورسز ءِ توسیپ کت کہ آہاں فتنہ الخوارج ءِ نا شریں منصوبگ آناں ناکام کتگ ءُ 5 ناشرکار کوش کتگ۔ آئی ءَ گوشت کہ مبارکیں رمضان ءِ ماہ ءَ فتنہ الخوارج ءِ نیمگ ءَ ناشرکاری ءِ کوشست اے گپ ءِ ثبوت انت کہ ناشرکاری ءَ را مذہب نیست، ءُ سیکورٹی فورسز ءَ وھد ءِ سر ءَ گامگیج زورگ ءَ چہ شھمک ءَ را مزنیں تاوان ءَ چہ رکینتگ۔ مزن وزیر ءَ گوشت کہ جزم ءُ برجائی ءِ وژن ءِ چیر دستی ءَ سیکورٹی فورسز ناشرکاری ءِ ھلاپ ءَ مزنیں سوبمندی یے رسگ ءَ انت۔ ناشرکاری ءِ ھلاپ ءَ اے جنگ ءَ سرجمیں راج پاکستانی لشکر ءِ ھمراھی ءَ اوشتاتگ۔ ما ملک ءَ چہ ھمک رنگ ءِ ناشرکاری ءَ را سرجمی ءَ ھلاس کنگ ءِ واستہ جزم آں ۔